Rasim Ramaldanov: XL-dən pulumu tələb etməkdə məna görmürəm

Azərbaycan yığmasının sabiq müdafiəçisi Rasim Ramaldanovun azerisport.az saytına müsahibəsi

- "Xəzər Lənkəran"dan ayrılandan sonra özünüzə klub tapa bilmirsiniz. Günləriniz necə keçir?
- Vaxtımı ailəmlə keçirirəm. Həm də fərdi qaydada məşq edirəm ki, formada qalım. Özümə yeni klub tapanda hazır olmaq istəyirəm.

- Klubların yanvar toplanışı artıq başa çatmaq üzrədir. Düşünmürsünüz ki, heç bir klubun toplanışında iştirak etməməyiniz sizə mənfi təsir göstərəcək?
- Bəli, razıyam. Amma fiziki cəhətdən mənə çox da çətin olmayacaq. Çünki özümü bu baxımdan tam hazır hiss edirəm.

- "Xəzər Lənkəran"a qayıdacağınız gözlənilirdi. Buna nə mane oldu?
- Bəli, "Xəzər Lənkəran" mənə yeni təklif göndərmişdi. Sadəcə, mən hazırda digər variantları düşünürəm. Digər tərəfdən, "Xəzər Lənkəran"ı bu vəziyyətdə görmək istəməzdim. Çünki bu komanda həmişə iddialı olub.

- Klubdan gedərkən sizə borclarının qaldıqlarını bildirmişdiniz. Nə qədər alacağınız var?
- Borc var. Amma həmin məbləği açıqlamaq istəməzdim.

- Həmin borc ödənilsə, "Xəzər Lənkəran"a qayıdacaqsınız?
- İndi klub heç də yaxşı günlərini yaşamır. Ona görə də "Xəzər Lənkəran"dan pulumu tələb etməkdə məna görmürəm.

- "Qəbələ", "Kəpəz", "Zirə" və "Neftçi"yə də keçəcəyiniz iddia olunurdu. Bu klublardan hansınasa keçidiniz hələ də mümkündür?
- Dəqiq bir fikir söyləyə bilmərəm. Nə olacaqsa, olacaq.

- Türkiyəyə getmək variantı da var idi...
- Türkiyə klubları ilə danışıq aparıram. Amma birinci divizion klublarıdır. Hələ ki, onlardan cavab gözləyirəm.

- Sizə elə gəlmir ki, bundan sonra Azərbaycan yığmasına da dəvət almayacaqsınız?
- Ola bilər. Amma "Xəzər Lənkəran"dakı son oyunlarım da göstərdi ki, mən demək olar ki, tam forma yığmışam. Ən azından milliyə dəvət ala bilərdim.