Ermin Zets: Bu çətinliklərə bir qədər dözmək lazımdır
"Qəbələ"nin hücumçusu Ermin Zetsin azerisport.az saytına müsahibəsi
- Türkiyə toplanışı necə gedir?
- İki həftədir hazırlıq keçirik. Bu müddət ərzində yaxşı işlər görmüşük. İki yoxlama oyunu keçirmişik. "Sürix"lə son sınaq matçımız çox uğurlu alındı və 4:0 hesabıyla qalib gəldik. Fikrimcə, düzgün yoldayıq. Bu cür hazırlıq çempionatda komandamıza ancaq fayda verəcək.
- "Osnabryuk"la ilk oyunda (1:1) qol vurmağınız sizin yaxşı formada olduğunuzu deməyə əsas verir?
- Özümü yaxşı hiss edirəm. Zədə olmasa, üçüncü dövrənin ilk turuna qədər tam hazır olacağam. Mövsümün ikinci hissəsini yaxşı keçirmək istəyirəm.
- Amma mövsümün geridə qalan hissəsini uğurlu keçirdiyinizi demək olmaz. Razısınız?
- Mən komandaya gec qoşulmuşdum, toplanışda iştirak etməmişdim. Daha sonra zədə aldım. Ona görə də mövsümün geridə qalan hissəsini uğurlu keçirə bilmədim. Bundan sonra daha çox oynamaq istəyirəm və ümid edirəm ki, hər şey yaxşı olacaq.
- Reynaldo və Almeyda kimi futbolçuları da qabaqlamaqla Azərbaycanda ən bahalı futbolçu hesab olunursunuz. Bu üzdən sizdən daha çox şey gözlənilir...
- Bundan xəbərim yoxdur. Heç Azərbaycanda ən bahalı futbolçu olduğuma diqqət də yetirməmişəm. Mən sadəcə, tam hazır olmaq və komandama fayda vermək istəyirəm.
- Azərbaycandakı məlum böhrandan sonra ölkə futbolunda ciddi problemlər yaranıb. Sizin buna münasibətiniz necədir?
- Bu, təkcə futbolda yox, bütövlükdə, ölkə üçün pis oldu. Hər şey yenicə başlayıb, amma klublar artıq böhrandan ciddi əziyyət çəkir. Fikrimcə, bütün bu çətinliklərə bir qədər dözmək lazımdır.
- "Qarabağ"la "Qəbələ"dən başqa digər klubların hamısı büdcəni azaltmaq məcburiyyətində qalıb. Sizə elə gəlmir ki, layiqli rəqiblərinizin olmaması sizin də çıxışınıza təsirini göstərəcək? Çünki əksər klublarda indi futbolçular 300-400 manat maaş alırlar.
- Bu, böyük problemdir. Amma bu barədə danışmaq mənə bir qədər çətindir. Çünki legioner futbolçuyam. Ümid edirəm ki, tezliklə hər şey əvvəlki kimi olacaq.
- Belə davam etsə, həm də sizin səviyyənizdə olan futbolçular da Azərbaycana gəlməkdən imtina edəcək...
- (gülür) Hər şey ola bilər. Ümid edirəm ki, hər şey o qədər pis olmayacaq.
