Kamran Quliyev: Bu ayrılığa görə heç kim məyus olmadı
"Sumqayıt"ın prezidenti Kamran Quliyevin azerisport.az saytına müsahibəsi
- "Sumqayıt"ın ötən gün Türkiyə toplanışı çərçivəsində İran çempionu "Sepahan"a məğlubiyyətini necə qarşıladınız?
- Komandamızın oyunu xoşuma gəldi. Samir Abasov ilk dəqiqələrdən ikinci heyəti meydana buraxmışdı. Əsas heyət üzvlərindən yalnız Emin Mehdiyevlə Cəmil Hacıyev meydanda idi. İran təmsilçisi isə əsas heyətlə oynayırdı. Məğlub olsaq da, uşaqlar yaxşı çıxış etdilər.
- Bəs əvvəlki oyunlarla bağlı nə deyərdiniz?
- Öncə Qazaxıstan "Akjayık"ı (1:0) və Rumıniya "Voluntari"si (0:0) ilə qarşılaşmışdıq. Həmin oyunlara da baxmışam və razı qaldığımı deyə bilərəm.
- Bütövlükdə, komandanın toplanışından nə dərəcədə razısınız?
- Məşqçilər korpusunun qarşısına komandanı mövsümün qalan hissəsinə yaxşı hazırlamaq hədəfi qoyulub. Eyni zamanda yeni gələn futbolçuların heyətə uyğunlaşdırılması da əsas məqsədlərimizdəndir. Komandanın fiziki və psixoloji baxımdan yaxşı vəziyyətdə olması xüsusi sevindirir. Zədəsiz ötüşməyimiz də sevindirməyə bilməz. Bir sözlə, toplanışdan razıyam.
- Səlahət Ağayevlə Vaqif Cavadovun durumundan razısınız?
- Səlahət qapıda duranda meydan oyunçuları da özlərini rahat hiss edirlər, sakit oynayırlar. Səlahət "Sumqayıt"da yenidir. Vaqifə gəlincə, o da çox çalışır. Məşqlərdə və oyunlarda gənc futbolçulara məsləhətlərini verir. Fikrimcə, onun çempionatda bizə ciddi köməyi dəyəcək.
- Şahruddin Məhəmmədəliyevin klubunuzu tərk edib "Qarabağ"a keçməsi çox gözlənilməz oldu. Bu, onun qərarı idi?
- Biz onunla müqaviləyə qarşılıqlı razılıq əsasında xitam verdik. Fikrimcə, bu ayrılığa görə heç kim məyus olmadı: nə biz, nə də o.
- Qarşıda sizi Rumıniya "Petrolul"u ilə daha bir oyun gözləyir. Ardından komanda vətənə qayıdacaq. Bəlkə toplanışın müddətini artırmaq lazımdır?
- Öncədən toplanışı yanvarın 16-dan 23-nə qədər nəzərdə tutmuşduq. Fikrimcə, bu müddəti artırmağın xüsusi bir əhəmiyyəti olmaz. Komandamız normal hazırlıq keçib. Evə dönüb, çempionata hazırlığı doğma meydanda davam etdirmək də həm plana, həm də məqsədə uyğun olacaq.
