Faiq Hüseynov: Millimiz qələbə qazananda, məni də təbrik edirlər
Vaxtilə "Neftçi" və Azərbaycan yığmasında çalışmış Faiq Hüseynov son on ildə Birləşmiş Ərəb Əmirliklərində işləyir. Azerisport.az saytına müsahibəsində idman masajisti öz karyerasından danışıb, digər sualları cavablandırıb.
- Çoxdan idi sizinlə söhbətləşmirdik. Karyeranız necə gedir?
- Maraq göstərdiyiniz üçün çox sağ olun. Son ildir ki, elə Dubayın "Əl-Əhli" klubunda işləyirəm. Prinsipcə, karyeramın kifayət qədər sabit olduğunu demək olar.
- İndiki komandanızda hansı uğurlarınız var?
- Asiya Çempionlar Liqasının son mövsümündə klubumuz finala qədər irəlilədi, yalnız final oyununda Çinin "Quanqjou Everqrand" klubuna uduzduq. Hansı ki, bu komandanı tanınmış Luis Felipe Skolari çalışdırır. İndi BƏƏ-də çempionluq uğrunda mübarizə aparırıq. Lider "Əl-Əyn"dən 3 xal geri qalırıq. Ümid edirəm ki, bu mövsüm də bizim üçün uğurlu bitəcək və çempion olacağıq.
- Səhv etmiriksə, ötən il Azərbaycana da gəlmişdiniz, Avropa Oyunlarını izləmişdiniz...
- Bəli, iyunda istirahətə buraxılarkən Bakıya gəlmişdim. Həmin vaxt Avropa Oyunlarına baş çəkərək voleybol, basketbol və çimərlik futboluna da baxdım.
- Təsadüfən, vətənə dönmək istəmirsiniz? Ya peşəkarlığa qiymət verilən xaricdə qalmaq daha yaxşıdır?
- Vətənə dönməyi həmişə arzulamışam. Eyni zamanda peşəkarlığın da hər yerdə qiymətləndirildiyini düşünürəm. Bu, həm bizim futbolda, həm də xaricdə belədir. Fikrimcə, indi bizim klublarda da peşəkar masajçılar kifayət qədərdir.
- "Neftçi"dəki, yığma komandamızdakı köhnə iş yoldaşlarınızdan hansı ilə əlaqələriniz qalır?
- Həm "Neftçi"də, həm də yığmada çalışdığım insanların demək olar ki, hamısı ilə əlaqə saxlayıram. Millimiz Dubaya təlim-məşq toplanışına gələrkən, onların hər matçını izləyirdim. Ən çox əlaqə saxladığım insan isə təbii ki, müəllimim Boris Xetaqurovdur. Ona yeni ildə can sağlığı arzulayıram. Eşitdiyimə görə indi klubsuzdur. Bu, çox pisdir. Belə mütəxəssislərdən yararlanmaq lazımdır.
- Azərbaycan futbolu Dubaydan necə görünür?
- Əlbəttə, Azərbaycan futbolu burada çox az adama tanışdır. Burada bütün diqqət Asiyaya yönəlib. Yığmamız uğurlu çıxış edəndə məni təbrik edirlər. Azərbaycan futbolunun əsas uğrularından biri klublarımızın avrokuboklarda sabit çıxış etməyə başlamasıdır. Amma təəssüf ki, millimiz bizi tez-tez sevindirə bilmir.
- Sosial şəbəkələrdə paylaşdığınız fotolara nəzər saldıqda görürük ki, tez-tez müxtəlif ulduz futbolçularla görüşürsünüz. Onlardan hansı ilə görüş sizin üçün daha yaddaqalan olub?
- Bu illər ərzində çoxlu futbolçu və məşqçi ilə tanış olmuşam. Əlbəttə, Fabio Kannavaro kimi ünlü bir futbolçu ilə çalışmaq çox xoşdur. Vaxtilə Dubayın başqa bir klubunda əfsanəvi Dieqo Maradona çalışırdı. Başa düşürdüm ki, onunla şəkil çəkdirmək oyundan öncə daha yaxşı olar. Çünki oyundan sonra ona yaxın düşmək olmur. Üstəlik, bu illər ərzində onun da şahidi oldum ki, futbolçu və məşqçi nə qədər tanınmışdırsa, onunla çalışmaq bir o qədər asandır. Çünki onlar gördükləri işdən həzz alırlar.
