Dmitri Kramarenko: Mixail Peskoviçin qalıb-qalmayacağı hələ bəlli deyil

"Neftçi"nin qapıçılarla iş üzrə məşqçisi Dmitri Kramarenkonun azerisport.az saytına müsahibəsi

- Mövsümün qalan hissəsinə hazırlıq necə gedir?
- Normal. Uşaqlar çalışırlar. Düzünü deyim ki, hazırlıq prosesində Türkiyəyə toplanışa getməməyimiz hiss olunmur. Ölkəmizdə elə vəziyət yaranıb ki, komandamız da buna tam adekvat addım atdı. Bunda təəccüblü heç nə yoxdur. Bakıda yaxşı hava hökm sürür. Optimal şəraitimiz var. Meydança da idealdır. Yaxşı turnirdə iştirak edirik. Gənc futbolçularımızı da sınaqdan keçirmək imkanımız var.

- Amma birinci divizion klubları ilə çətinliklə bacarırsınız...
- Bu da normaldır. Ötən gün MOİK-ə qalib gəldik. "Neftçala" ilə oyunda isə səkkiz meydan oyunçusu ilə mübarizə aparmaq məcburiyyətində qalmışdıq.

- Dekabrda Mixail Peskoviçin komandadan göndəriləcəyi deyilirdi...
- Bu məsələ hələ həllini tapmayıb. Onun müqaviləsində elə bənd varki, bunun həll olunması vacibdir. Bir sözlə, Peskoviçin qalıb-qalmayacağı bəlli deyil.

- Klubunuz buna görə Kamran Ağayev və Səlahət Ağayevlə danışıq aparmadı?
- Biz bu qapıçıların nəyə qadir olduğunu yaxşı bilirik. Əslində, ölkəmizdə yaxşı qapıçıların sayı elə də çox deyil. Kamran, Səlahət və bizim Aqil Məmmədov. Aqil pis çıxış etmir. Kamranla Səlahətin də hansınısa komandaya dəvət etsəydik, iki ən yaxşı qapıçıdan birini ehtiyatda saxlamalı olacaqdıq. Bunu etməyə isə səbəb görmürəm.

- Deməli, Aqil Məmmədovu tələf etməmək üçün buna getmədiniz?
- Məsələ bunda da deyil. Belə bir imkan mövsümün əvvəlində olsaydı, bəlkə də onlardan hansınısa transfer etmək olardı. Amma indi sabit çıxış edən qapıçımız varsa, başqa qolkiper axtarmaqda məna görmürəm.

- Akademiyanızda çalışan Hüseyn Məhəmmədov niyə getdi?
- Klubun öz kodeksləri var. Belə məsələləri rəhbərlik həll edir. Bu qərarı müzakirə edə bilmərəm. Hüseyni çoxdan tanıyıram. Biz onunla birgə oynamışıq. Öz işini yaxşı görən insandır. Bu baxımdan ona irad bildirmək olmaz. Amma təəssüf ki, hər şey belə alındı.

- Manatın devalvasiyası barədə nə düşünürsünüz?
- Asan vəziyyət deyil. Amma hər şey o dərəcədə pis də deyil. Faciəvi heç nə olmayıb. Sadəcə, "Xəzər Lənkəran", "Bakı" kimi klubların belə vəziyyətə düşməsi məyus etməyə bilməz. Bütün bunlara dözmək lazımdır. Bu vəziyyət təkcə Azərbaycanda deyil. Məsələn, Rusiyada çalışan Emin Ağayevlə söhbətləşirəm. Onun dediyinə görə, Rusiya Premyer Liqası istisna olmaqla qalan bütün liqalarda vəziyyət çox acınacaqlıdır. Ümid edirəm ki, bütün bu çətinliklərə baxmayaraq, öz səviyyəmizi qoruyub saxlaya biləcəyik.