Mirzağa Hüseynpur: Samir Abasovun imtinası mənim pis futbolçu olduğum anlamına gəlmir
"Sumqayıt"dan ayrıldıqdan sonra "Xəzər Lənkəran"a keçidi gözlənilən hücumçu Mirzağa Hüseynpurun azerisport.az saytına müsahibəsi
- "Sumqayıt"dan ayrılmağınıza nə səbəb oldu?
- Klub rəhbərliyi və baş məşqçi belə qərar qəbul etdi.
- Az şans qazandığınızı düşünürsünüz?
- Təəssüf ki, bəli, az şans qazanırdım. Bunun da müəyyən qədər təsiri oldu.
- Yəni "Sumqayıt"ın məhz sizin vurduğunuz qol sayəsində "Qarabağ"a qalib gəlməsi də komandada qalmağınıza kömək etmədi?
- Həmin qol və qələbə doğrudan da yaddaqalan oldu. Oynadığım digər oyunlarda da komandaya faydalı olmağa çalışmışam. Amma buna baxmayaraq, təəssüf ki, mənimlə yolları ayırmağa qərar verdilər. Nə etmək olar? Futbolda belədir. Heç kimdən incimirəm.
- Bəs əsas problem nədə idi?
- Hər bir baş məşqçinin futbola öz baxışı var. Deməli, mənim oyun üslubum baş məşqçinin ürəyincə olmayıb. Bu, heç də mənim pis futbolçu olduğum anlamına gəlmir. Sadəcə, Samir Abasova başqa tipli futbolçu lazım idi.
- İndi yayda "Sumqayıt"a qayıtdığınıza görə təəssüflənmirsiniz?
- Xeyr. Fikrimcə, komandaya bu müddət ərzində faydalı ola bildim. Əsas budur.
- "Xəzər Lənkəran"dan dəvət almısınız. Artıq razılaşmısınız?
- Hələ "Xəzər Lənkəran"a keçməmişəm. Danışıqlar hələ davam edir. Bu üzdən də razılıq əldə etdiyimizi deməzdim.
- Başqa klublardan da təkliflər var?
- Bəli. Azərbaycandan, eləcə də Rusiya klublarından məni heyətində görmək istəyənlər var. Sabit çıxış edə biləcəyim komandanı seçəcəyəm. Mənə indi oyun təcrübəsi çox lazımdır.
