Zirə almanlara da məğlub oldu
“Zirə” Türkiyənin Antaliya şəhərində təşkil olunan təlim-məşq toplanışında ikinci yoxlama oyununa çıxıb. Azerisport.az xəbər verir ki, Premyer Liqamızın debütantı Almaniyanın Regional liqası təmsilçilərindən “Optik”lə qarşılaşıb.
Oyundan öncə "Zirə" tərəfindən 20 Yanvar faciəsi ilə bağlı kompaniya keçirilib. Üzərində 1990-cı il yanvarın 19-dan 20-nə keçən gecə baş verənlərin təsvir olunduğu şəkillər və faciə haqqında yazılı məlumatların yer aldığı kağızlar üç dildə hazırlanaraq, həm Almaniya təmsilçisinə, həm də "Zirə"nin futbolçularına təqdim edilib. Zirəli futbolçular meydana qara sarğıyla çıxıblar və oyundan öncə 20 Yanvar şəhidləri bir dəqiqəlik sükutla anılıb.
Oyuna gəlincə, “Zirə” meydana Anar Nəzirov, Sadiq Quliyev, Yovan Krneta, Aleksandr Şemonayev, Tellur Mütəllimov, Dieqo Souza, Vüqar Mustafayev, İqor İvanoviç, Rəşad Abdullayev, Vüsal İsgəndərli, Nurlan Novruzov “11-liyi” ilə çıxıb. Qarşılaşmanın əvvəllərindən “qartallar” üstünlüyü ələ alıblar. Təşkil olunan hücumlar zamanı bir neçə dəfə hesabı açmaq imkanı yaranıb. Hələ hissənin əvvəllərində Dieqo Souza zədələnərək meydanı tərk edib. Onun yerinə isə Tato oyuna daxil olub. Qarşılaşmanın ilk yarısında qapılara qol vurulmayıb. Oyunun 2-ci hissəsində baş məşqçi Adil Şükürov meydana Kamal Bayramov, Adil Nağıyev, Ruslan Poladov, Nicat Qurbanov, Tərzin Cahangirov və Nelson Bonilyanı buraxıb. Fasilədən sonra da üstünlük “Zirə”nin tərəfində olub. Ancaq çox keçməmiş rəqib oyun ərzində yaratdığı yeganə təhlükəli vəziyyətdən istifadə edərək hesabı açıb. Bundan sonra da təşəbbüs “qartallar”da olub. Amma futbolçular real qol vəziyyətlərindən yararlana bilməyiblər və oyun rəqibin 1:0 hesablı qələbəsi ilə başa çatıb.
“Zirə” toplanış zamanı son oyununu yanvarın 22-də Rumıniyanın “Tırqu-Mureş” klubuna qarşı keçirəcək. (klub saytı)
