Elxan Abdullayev: Bakıda da yaxşı hazırlaşmaq üçün hər şərait var
Azərbaycan yığmasının məşqçisi Elxan Abdullayevin azerisport.az saytına müsahibəsi
- Ölkə daxilində hazırlıq keçən klublar arasında təşkil olunan mini turnir və onun səviyyəsi barədə nə deyə bilərsiniz?
- Əlbəttə, turnirin səviyyəsi daha yaxşı ola bilərdi. Amma istənilən halda belə bir turnirin təşkil olunması müsbət məqamdır. Ölkə xaricinə gedə bilməyən klublar üçün bu turnirin faydası böyükdür. Məncə, "Qarabağ" və "Qəbələ" üçün belə bir turnirdə iştirak etmək maraqlı olmazdı. Təbii ki, sınaqçı rəqiblər baxımından Antalyaya getmək daha yaxşıdır. Necə də olmasa, "Verder"lə oynamaq "Şərurspor"la qarşılaşmaqdandaha yaxşıdır. Bu mənada Türkiyə toplanışı vacibdir. Amma digər mənada burada qalan klublarımız üçün heç bir çatışmazlıq yoxdur. Məsələn, "Neftçi"nin məşqlərinə gedirəm. Bakı Olimpiya stadionunun əla meydançası var. Yaxşı otellərimiz də yetərincədir. Bir sözlə, Bakıda da yaxşı şərtlər altında məşq etmək, hazırlaşmaq mümkündür. Amma təbii ki, qarşısına yüksək hədəflər qoymuş klublar ölkə xaricinə getməyə üstünlük verirlər.
- "Şərurspor" kimi komandalarla oyunlar "Neftçi"yə nə verir?
- Bu klubun nümayəndələrinin yerinə danışa bilmərəm. Onların ölkə xaricinə getməkdən imtinasının səbəbini bilmirəm.
- AZAL hələ mövsümün əvvəlində maaşları həvəskar səviyyəyə qədər azaltmışdı. İndi də "Rəvan" və "Xəzər Lənkəran" oxşar addım atır. Necə olacaq?
- Milli manatın devalvasiyası klublarımıza çox böyük təsir göstərdi. Təkcə onlara yox, bütövlükdə ölkəmizə. Amma bu, o demək deyil ki, buna görə oturmaq, iş görməmək lazımdır. Bizim dövrümüzdə bundan da çətin vəziyyət hökm sürürdü. Bunlar müvəqqətidir. Bir qədər dözmək lazımdır. Əsas ruhdan düşməməkdir.
- Bu, milli çempionatdakı rəqabətə nə dərəcədə təsir göstərəcək?
- Bütün çətinliklərə baxmayaraq, çempionatda fasiləyə qədər yaxşı rəqabət var idi. Düzdür, klubların bəzisinin gücü azalıb. Yalnız "Qarabağ"la "Qəbələ" qalanlarının hamısını bir az üstələyir. Amma zəif komandalara qarşı oynayanda güclülərin də səviyyəsi aşağı düşür.
- Azərbaycan yığmasının bu ilki ilk rəqibi barədə nə deyərdiniz?
- Yoxlama oyunu üçün Qazaxıstan yaxşı rəqibdir. Biz onlarla qarşılaşmışıq. İmkanlarına bələdik. Yaxşı rəqibdir. Gənc komandamız üçün belə rəqiblərlə oyunlar çox vacibdir.
