Azərbaycan yığması AÇ öncəsi problemlə üzləşdi
Futzal üzrə Azərbaycan yığması fevralın 2-də Serbiyanın paytaxtı Belqradda start götürəcək Avropa çempionatının final mərhələsinə hazırlığı davam etdirir. Azerisport.az xəbər verir ki, yığmamız qitə birinciliyi öncəsi problemlə üzləşib.
Belə ki, komandamızın baş məşqçisi Tino Peres futbolçuları yoxlama oyununda sınaqdan keçirmək istəsə də, Azərbaycan Futzal Federasiyasının bu yöndə cəhdləri uğursuzluqla nəticələnib. Belarus, Ukrayna və Qazaxıstan yığmalarından birini Bakıya gətirməyə çalışan federasiya rəhbərliyi qarşı tərəfi buna razı sala bilməyib. AÇ-2016-nın final mərhələsinin digər iştirakçılarının hər biri hazırda yoxlama oyunları keçirdiyi halda, yığmamızın bundan məhrum olması məşqçilər korpusu üçün ciddi problem hesab olunur. Peres bu boşluğu sadəcə, yerli klublarda çıxış edən futzalçılardan ibarət yığmaya qarşı yoxlama oyunları ilə doldurmağa çalışır.
