Elbrus Məmmədov: Bu, mənim üçün böyük zərbə oldu

"Xəzər Lənkəran"ın baş məşqçisi Elbrus Məmmədovun azerisport.az saytına müsahibəsi

- Siz doğrudan da "Xəzər Lənkəran"a qayıtmısınız?
- Bəli, artıq Lənkərandayam. Vəziyyəti yaxşıya doğru dəyişməyə çalışıram. Amma təəssüf ki, hər şey məndən asılı deyil.

- Niyə?
- İş çoxdur. Həm də maliyyə problemlərimiz var. Rəhbərlikdən dəstək gözləyirəm.

- Bəs bu gün komandanı tərk edib, sabah yenidən kluba qayıtmağınıza nə səbəb oldu?
- Futbolçuların maaşının bir hissəsinin ödəniləcəyini gözləyirdim. Uşaqları da hər şeyin yaxşı olacağına inandırmışdım. Amma komandanı məşqə çıxaranda futbolçuların bir hissəsinin meydanda olmadığını gördüm. Bu, mənim üçün böyük zərbə oldu. Onların çoxu mənim rəhbərliyim altında uzun müddət məşq etmişdi. Məşqdən öncə hətta onların valideynləri ilə də görüşmüşdüm və bildirmişdim ki, hər şey yaxşı olacaq. Böhran təkcə "Xəzər Lənkəran"da deyil. Ona görə bir az dözmək lazım idi.

- Bəs sizi geri qayıtmağa nə vadar etdi?
- Klub rəhbərliyi ilə görüşüm oldu. Onlar məni hər şeyin yaxşı olacağına inandırdılar. Komanda yaşayacaq. Borcların da bir hissəsi bu həftə ödəniləcək.

- Belə vəziyyətdə komandanı hazırlaşdırmaq çətin olmayacaq ki?
- Mövsümün qalan hissəsinin bərpasına demək olar ki, çox az vaxt qalıb. Futbolçuların fiziki hazırlığını heç olmazsa, 50 faiz qaydasına sala bilsək, buna sevinəcəyəm. Ümid edirəm ki, bütün bu çətinliklər tezliklə geridə qalacaq, bunları unudacağıq və yaxşı günlər gələcək.

- Heyəti gücləndirəcəksiniz?
- Rasim Ramaldanov və Tural Cəlilovla əlaqə saxlayıram. Onları komandada görmək istəyirəm. Xüsusilə də Rasimin komandada olmasını çox istərdim. Onun mənə çox böyük köməyi dəyər.

- Hədəfiniz nə olacaq?
- Premyer Liqadakı yerimizi qorumağa, mümkün qədər üst pillələrə çıxmağa çalışacağıq. Komanda hər oyunda sonadək mübarizə aparacaq.