Samir Abasov: Əvvəllər biz belə futbolçuların transferini heç arzu edə bilməzdik
"Sumqayıt"ın baş məşqçisi Samir Abasovun azerisport.az saytına müsahibəsi
- Öncə ənənəvi sualdan başlayaq: manatın devalvasiyası sizə nə dərəcədə təsir göstərib?
- Devalvasiyaya qədər maliyyə baxımından bəzi klublara uduzurduq. Amma devalvasiyadan sonra demək olar ki, bütün klublar problemlərlə üzləşdilər. Biz öz mövqeyimizi saxlayırıq. Çünki bizim büdcəmiz onsuz da böyük deyildi. Böhran bizə də təsir edib. Amma digər klublardakı qədər çox yox.
- Deməli, klubların şansları bərabərləşir?
- Ən azından fərq azalır. Əvvəllər hansısa kluba bir futbolçunun ayına 10-15 min təklif edə bilirdisə, biz onlarla rəqabət apara bilmirdik. Amma indi fərq azalmağa doğru gedir. Məsələn, biz əvvəllər Səlahət Ağayev, Vaqif Cavadov kimi futbolçuların transferini heç arzu edə bilməzdik.
- Amma problemlərə baxmayaraq, komandanız bu transfer pəncərəsində ən fəallardan biridir...
- Digər klubların passivliyi fonunda biz fəal görünə bilərik. Azərbaycan yığmasının oyunçuları ilə güclənmişik. Amma əsas bu transferlərin özlərini doğrultmasıdır.
- Son olaraq Səlahət Ağayevi transfer etmisiniz. O, "Sumqayıt"ı gücləndirə biləcək?
- Bizdə qapıçı mövqeyi problemli idi. Səlahətin gəlişi ilə bu problemin yoluna düşəcəyinə inanıram. Prinsipcə, yığmanın da bir nömrəsi o olmalıdır.
- Məgər bir nömrə Kamran Ağayev deyil?
- Məndə olan məlumata görə, millinin baş məşqçisi Robert Prosineçki bir nömrə kimi Səlahəti görür.
- Bu mövsüm Avropa Liqasına vəsiqə üçün mübarizə apara bilərsiniz?
- Xal fərqi çox böyükdür. Bunu əritmək çox çətin olacaq. Reallığı nəzərə almaq lazımdır. Amma biz mümkün qədər üst pillələrdə qərarlaşmaq istəyirik. Azərbaycan Kubokunda da şansımız var. Baxmayaraq ki, Azərbaycanın ən yaxşı komandasına qarşı oynamalı olacağıq.
- İlk hazırlıq mərhələsi necə keçdi?
- Əla. Bəzi oyunçular bizə gec qoşuldular. Amma ikinci mərhələdə tam heyətlə və daha ciddi hazırlıq keçəcəyimizi düşünürəm. Bizi maraqlı hazırlıq prosesi gözləyir.
- Komandanın Türkiyə toplanışı nə verəcək?
- Yaxşı şəraitimiz, sınaqçı rəqiblərimiz olacaq. Uşaqlar məşqçilər korpusunun onlardan nə gözlədiyini yaxşı bilir. Güclü rəqiblərlə oyunlar futbolçuların çempionatda özlərini daha inamlı hiss etməsinə şərait yaradacaq.
