Yaşar Vahabzadə: Bakıdakı qələbənin təsadüfi olmadığını Rusiyada da isbatlamalıyıq
Azərbaycanın U-21 yığmasının baş məşqçisi Yaşar Vahabzadənin azerisport.az saytına müsahibəsi
- Yığmamızı qarşı Türkiyə toplanışı və beynəlxalq turnir gözləyir. Bu yöndə hazırlıqlar necə gedir?
- Bu toplanış bizim üçün çox vacibdir. Ümid edirəm ki, məhsuldar toplanış olacaq. Turnirə gəlincə, keçirəcəyimiz hər bir oyun uşaqlar üçün böyük təcrübə deməkdir. Mart ayında bizi Avropa çempionatının seçmə mərhələsi çərçivəsində Rusiya ilə oyun gözləyir. Həmin oyun öncəsi yaxşı hazırlıq prosesi keçmək istəyirik.
- Komandada yeni simalar olacaq?
- Bəli. Bir neçə yeni futbolçu cəlb etmək istəyirik. Premyer Liqanın son turlarında bəzi futbolçular diqqətimizi çəkib. İndi də Bakıda qış turniri keçirilir. Həmin oyunçuların bəzisini burada da iş başında görmək imkanımız olacaq.
- Sizə elə gəlmir ki, ölkə futbolundakı maliyyə böhranı gənclərdən ibarət yığmamızın xeyrinə olacaq? Çünki klublar daha çox gənclərə şans verməklə, öz büdcələrini qorumağa çalışırlar...
- Dediyiniz kimi olacaqsa, təbii ki, daha çox gənc futbolçunu meydanda görəcəyik. Amma burada hər şey klublardan yox, futbolçuların özündən də asılıdır. Onlar özlərini yaxşı tərəfdən göstərməli, əsas heyətdə oynamağa layiq olduqlarını isbatlamalıdırlar. Hazırda onların çoxu limitin sayəsində meydana çıxmaq şansı qazanır. Amma çox istəyərdim ki, gənclərimiz öz gücləri, oyunları sayəsində əsas heyətə layiq olduqlarını göstərsinlər.
- Rusiya yığmasının Bakıda Azərbaycana məğlubiyyətinin bu ölkədə hələ də unudulmadığından yəqin ki, xəbəriniz var...
- Xəbərim var. Amma onların bu məğlubiyyəti niyə belə qəbul edə bilmədiyini anlaya bilmirəm. Buna normal yanaşmaqlazımdır. Həmin matçdakı məğlubiyyətə görə baş məşqçiləri də istefaya göndərildi. Halbuki, bu tsikldə onların hansısa uğur qazanması inandırıcı görünmür.
- Sizcə, ruslar Dmitri Xomuxanı istefaya göndərməklə səhvə yol verdilər?
- Bəli.
- Sizə elə gəlmir ki, ruslar öz meydanlarında Bakıdakı məğlubiyyətin qisasını artıqlaması ilə almaq üçün əllərindən gələni edəcəklər?
- Bu, aydın məsələdir. Burada mənim əlavə edəcəyim heç nə yoxdur. Biz də öz növbəmizdə ciddi hazırlaşacağıq. Bizim üçün sadəcə, seçmə mərhələnin növbəti bir oyunu olacaq. Komandamız Bakıdakı qələbənin təsadüfi olmadığını səfərdə də isbatlamalıdır. Özümüzü yaxşı tərəfdən göstərməyə çalışacağıq.
