Əsgər Abdullayev: Neftçi hər iki cəbhədə mübarizə aparmağa qadirdir
"Neftçi"nin baş məşqçisi Əsgər Abdullayevin azerisport.az saytına müsahibəsi
- Yeni təşkil olunan qış turniri ilə bağlı nə deyərdiniz?
- Bu turnir iştirakçı komandalara daha yaxşı hazırlaşmağa, ehtiyat qüvvəni sınaqdan keçirməyə yaxşı şans yaradır. Gənc futbolçulara şans verəcəyik. Gələcəkdə bu turniri daha da genişləndirmək olar.
- Rəqiblərinizin çoxu daha yaxşı şərtlər altında hazırlaşır...
- Onların öz hazırlıq planı var, bizim öz planımız. Fikrimcə, bu yolda sözügedən turnirin də bizə faydası çox olacaq.
- Şans verdiyiniz gənc futbolçular ümidlərinizi doğrultdular?
- Kamran Nəcəfzadə meydanda işgüzarlığı ilə xoşuma gəldi. Eyni zamanda futbolçularda əsas heyətə düşmək üçün çalışqanlığı da görürəm. Bunu isə ən çox Kamranda hiss etdim.
- Turnir cədvəlindəki mövqeyi heç də yaxşı olmayan "Neftçi" liderlərlə aradakı fərqi azalda biləcək?
- Əsas hədəfimiz də budur. Avrokuboklara vəsiqə qazanmağa borcluyuq.
- Bəs ölkə kubokunda?
- Bizim üçün hər iki turnir vacibdir. Çempionatdakı şanslarımız da çox pis deyil. Ona görə də hər iki cəbhədə mübarizə aparmağa çalışacağıq.
- Təkcə əvəzedici heyətdən dəvət etdiyiniz futbolçularla kifayətlənəcəksiniz, ya başqa transferləriniz də olacaq?
- Hələ ki, yalnız əvəzedici komandadan gələnlərdir. Mənim hətta 17 yaşlı gəncləri də dəvət etmək fikrim var ki, onların ümidini artırım, daha həvəslə çalışsınlar, oynasınlar. Futbolda yaş bəzən aldadıcı olur. Məsələn, Kamran xoşuma gəldi. Yaşına baxmayaraq, o, əsas komandada oynaya, baxımlı futbol sərgiləyə bilər.
- "Qəbələ" və "Qarabağ" istisna olmaqla, digər bütün klubların maliyyə çətinlikləri var. Sizə elə gəlmir ki, bu, "Neftçi"nin üst sıralara qalxması üçün bir şansdır?
- Bizdə problem yoxdur. Rəhbərlik bizim üçün normal şərait yaradıb. Sadəcə, sınaqçı-rəqiblər tapmaq baxımından problem ola bilərdi. Gördüyünüz kimi, qış turniri sayəsində bu problemimiz də aradan qalxdı.
- Çempionatımızın səviyyəsi aşağı düşüb, deməli, rəqabət də zəifləyib. Bu, gələcəkdə avrokuboklarda çıxışınıza təsirini göstərə bilər?
- "Neftçi"yə təsir göstərməyəcək. Həm də indi bu mövzunun yeri deyil. Hər şeyi zaman göstərəcək. Rəqabət əvvəlki qədər olmaya bilər, amma əsas odur ki, futbolçularımızın səviyyəsi qalxsın.
