Daha bir klub Bakıdakı mini turnirdən imtina edir

Qış fasiləsi zamanı xaricə gedə bilməyən klublarımız üçün Bakıda təşkil olunan mini turnirin iştirakçıları azala-azala gedir. Azerisport.az xəbər verir ki, daha öncə "Qaradağ Lökbatan"la "Xəzər Lənkəran" sözügedən turnirdə iştirak etməyəcəyini açıqlamışdı.

İndi də "Rəvan"ın turniri tərk etməsi gözlənilir. Buna səbəb komandanın ciddi maliyyə problemləri ilə üzləşməsidir. Bir neçə aydır maaş ala bilməyən komanda üzvləri ötən gün məşqə çıxmaqdan imtina etmişdilər. Onların borcları ödənilməsə, etiraza davam edəcəklərini bəyan ediblər. Belə olan halda komanda turnirə hazır ola bilməyəcək və "Rəvan" da iştirakdan imtina edəcək.

Hazırda komandanın düşərgəsində 16 futbolçu hazırlıq keçir. Bu gün səhər məşqinə çıxan oyunçulardan dördü qapıçı olub. Digər oyunçuların yarısı əvəzedici heyətdən dəvət olunanlar, qalanı isə baxışa gələnlərdir. Baxışa dəvət olunanlar da birinci divizion klublarından gəliblər.