Namiq Ələsgərov: Kəpəzdə problemlə üzləşəcəyimi düşünmürəm
"Qarabağ"ın "Kəpəz"ə icarəyə verdiyi Namiq Ələsgərovun azerisport.az saytına müsahibəsi
- "Kəpəz"ə keçidiniz necə alındı?
- Zədədən sonra mümkün qədər tez forma toplamağım üçün mənə oynamaq lazımdır. Mən özüm də bu barədə çox düşünürdüm. Mövsümün sonunadək "Kəpəz"də oynamaq təklifi gəldi. Bu, həm mənim, həm də hər iki klub üçün yaxşı seçim idi.
- Başqa variantlar da var idi?
- Xeyr. Ancaq "Kəpəz"dən dəvət vardı.
- Zədədən sonrakı müalicə və bərpa prosesiniz çox uzun çəkdi...
- Zədəm elə idi ki, hər bir müalicə fərqli olurdu. Amma son dövrlər klubumda məşq edirdim.
- "Qarabağ"a keçidinizin heç də uğurlu seçim olmadığı barədə fikirlərlə razısınız?
- Tam razı deyiləm. Hər şey yaxşı idi. Hər bir futbolçu zədə ala bilər. Ümid edirəm ki, "Kəpəz"də hər şey yaxşı olacaq və bütün çətinlikləri geridə qoyacağam. Əvvəlki formamı bərpa edəcəyimə ümidliyəm.
- Sizin icarəyə verilməyiniz Qurban Qurbanovun ideyası oldu?
- Təklif "Kəpəz"dən gəldi. Mən də Qurban Qurbanovla məsləhətləşdim və o, razılaşdı.
- Yəqin ki, Malta ilə həmin oyun yadınızdan çıxmır: qol ötürməsi edirsiniz və zədələnirsiniz...
- Bəli, həmin oyunu heç vaxt unutmayacağam. Çünki bu, həm də mənim yığmadakı ilk oyunum idi. Milliyə yenidən qayıtmağa çalışacağam.
- Baş məşqçi Robert Prosineçki sizinlə maraqlanırdı?
- Bəli, özü də tez-tez. Sağ olsun.
- "Qarabağ" "Kəpəz" qarşısında belə bir şərt qoymayıb ki, siz doğma klubunuzla oyunda meydana çıxmayasınız?
- Xeyr, belə bir şey olmayıb.
- Sizcə, "Qarabağ" bu mövsüm çempion ola biləcək?
- "Qarabağ" hazırda çempionluğa ən real namizəddir. Böyük ehtimalla onlar qalib olacaqlar. Amma yenə də indidən dəqiq nəsə söyləmək çətindir. Qarşıda yarım mövsüm var.
- Sizin komandadan getməyinizlə Muarem Muaremin geri qayıtması eyni vaxta təsadüf etdi...
- O, təcrübəli futbolçudur və komandaya faydası dəyəcək. Uğurlar arzulayıram.
- "Kəpəz"ə uyğunlaşmaq çətin olmayacaq?
- "Kəpəz"də əvvəllər birgə oynadığım xeyli oyunçu var. Orada problemlə üzləşəcəyimi düşünmürəm.
