Kəpəz Bakıdakı turnirdən imtina etdi

Bu gün Azərbaycan klublarının iştirakı ilə qış fasiləsi dövründə keçiriləcək mini-turnirin püşkü atılacaq. Azerisport.az xəbər verir ki, turnir yanvarın 13-də start götürəcək və ayın 24-də yekunlaşacaq.

Təşkilatçılardan olan AZAL-ın vitse-prezidenti Fikrət Hüseynovun saytımıza verdiyi məlumata görə, bu gün saat 16:00-da turnirə qatılacaq klubların nümayəndələrinin iştirakı ilə toplantı baş tutacaq. Həmin toplantıda elə turnirin püşkü də atılacaq və reqlament müəyyənləşəcək.

Qeyd edək ki, bu turnirdə dördü Premyer Liqa ("Neftçi", AZAL, "Xəzər Lənkəran", "Rəvan"), qalanı isə birinci divizion təmsilçisi ("Şərurspor", "Qaradağ Lökbatan" , "Neftçala" və MOİK) olmaqla səkkiz klub iştirak edəcək. Komandalar dörd komandadan ibarət iki qrupda mübarizə aparacaq. İlkin formata görə, qrup birinciləri finalda turnirin qalibini müəyyənləşdirəcəklər. Turnirin oyunları "Bayıl Arena" və "AZAL Arena"da keçiriləcək.

Sonda onu da xatırladaq ki, "Kəpəz" bu turnirdə iştirakdan imtina edib. Buna səbəb Gəncə klubunun Yevlaxda təlim-məşq toplanışında olmasıdır.