Tural Axundov: Rəşad Eyyubovun gedişi Kəpəzə təsir edəcək

"Kəpəz"in kapitanı Tural Axundov komandanın yarımmüdafiəçisi Rəşad Eyyubovun "Qəbələ"yə keçidini şərh edib. Azerisport.az saytına açıqlamasında o, bunları söyləyib:

"Rəşada görə sevindim. Çünki o, "Qəbələ" kimi iddialı kluba transfer oldu. Bu isə "Kəpəz"in yaxşı komanda olduğunun, keyfiyyətli futbolçulara malik olmasının göstəricisidir. Əlbəttə, onun gedişi komandamıza təsir göstərəcək. Çünki Eyyubov əsas heyətin oyunçularından idi. Üstəlik, yaxşı forma yığmışdı. Mən də bu qış "Qəbələ"yə keçə bilərdim. Amma "Kəpəz"lə müqaviləm olduğundan, komandada qalıb, kömək etməyə qərar verdim".