Şəhriyar Rəhimov: Millini yox, Kəpəzi düşünürəm

"Kəpəz"in müdafiəçisi Şəhriyar Rəhimovun azerisport.az saytına müsahibəsi

- Komandanızın mövsümün ilk iki dövrəsindəki çıxışını necə qiymətləndirərdiniz?
- Heyət demək olar ki, yenidir. Komanda yayda formalaşıb. Qarşımızda duran əsas hədəflərdən biri ilk altılıqda yer almaq idi. Amma "Kəpəz"in nəticələri daha uğurlu alındı. Tədricən başa düşdük ki, daha yaxşı nəticələr qazana bilərik. Artıq avrokuboklara vəsiqə qazanmaq istəyirik.

- "Kəpəz" buna nail ola biləcək?
- İndidən nəyin necə alınacağını demək çətindir. Amma əminliklə deyə bilərəm ki, biz ilk dördlükdə yer almaq üçün əlimizdən gələni edəcəyik. Fikrimcə, "Kəpəz"in buna qadir potensialı var.

- 2015-ci ili beşinci pillədə başa vurdunuz. Daha yaxşı nəticəyə imza ata bilərdiniz?
- Bütövlükdə götürsək, 5-ci yer də bizim üçün pis nəticə deyil. Düzdür, daha üst pillələrdə yr ala bilərdik. İkinci dövrədə cəmi bir oyunda məğlub olduq. Amma ilin sonuna yaxın vacib xallar itirməyə başladıq. Buna baxmayaraq, vəziyyətimiz elə də pis deyil. Liderlər qrupundakı komandalardan cəmi 2-3 xal geri qalırıq.

- Hansı oyunlar yaxşı və ya pis mənada sizin üçün daha yaddaqalan oldu?
- Yaxşı oynayıb xal itirdiyimiz oyunlar az olmadı. Amma əksinə də oldu. Məsələn, biz AZAL-a qarşı Gəncədə zəif çıxış etdik. Qələbə qazansaq da, nəyə qadir olduğumuzu tam şəkildə göstərə bilmədik. Amma "Zirə"yə qarşı Gəncədə çox yaxşı oynadıq, gözəl futbol sərgilədik. Rəqib isə matçın son saniyələrində məğlubiyyətdən qaçmağı bacardı.

- Komandanızın aparıcı üzvü Dario Junior sağalana qədər sizin çətinliklərinizin davam edəcəyi təəssüratı yaranır...
- Əlbəttə, o, bizim üçün vacib oyunçudur. Amma "Kəpəz"in Dariosuz heç nə edə bilmədiyini demək də olmaz. Şübhəsiz ki, ciddi itkidir. Lakin biz onsuz da yaxşı oyun sərgiləyirik. Düzdür, qol vəziyyətlərindən yararlanmaq baxımından problemlər vardı, ona görə qələbə qazana bilmirdik. Bəlkə də Darionun yoxluğu ona görə belə hiss olunur.

- Geridə qalan yarım mövsüm ərzində üç qol vurmusunuz. Yəqin ki, heç vaxt bir komandada bu qədər qola imza atmamışdınız...
- Bəli, elədir. Əvvəllər ən çox AZAL-da 2 qol vurmuşdum. Şübhəsiz ki, qol vurmaq həmişə xoşdur. Amma əsas komandanın uğur qazanmasıdır.

- Premyer Liqamızın səviyyəsinin düşdüyünə dair fikirlərlər razısınız?
- Mən belə deməzdim. Əlbəttə, maliyyə baxımından komandalardan zəifləyənlər var. Reallıq belədir. Amma çempionatdakı rəqabətin gərgin olduğunu düşünürəm. Məsələn, ikinci yerlə altıncı pillədə qərarlaşan komandalar arasında cəmi altı xallıq fərq var.

- Azərbaycan yığmasında ən zəif mövqelərdən biri sol cinah müdafiəçisidir. Siz də klubunuzda məhz həmin mövqedə oynayırsınz. Sizcə, Robert Prosineçkinin niyə diqqətini çəkə bilmirsiniz?
- Nə deyə bilərəm? Qismət olacaqsa, məni də milliyə dəvət edəcəklər. İstənilən futbolçu ölkəsinin milli komandasında oynamağı arzulayır. Amma hazırda bütün diqqətim "Kəpəz"in oyunlarına yönəlib, yığmaya yox.