Samir Əliyev: Neftçiyə qayıdışım mənim ancaq xeyrimə olacaq
"Neftçi"nin baş məşqçisi Əsgər Abdullayevin köməkçisi təyin olunan Samir Əliyev bununla əlaqədar azerispot.az saytının suallarını cavablandırıb.
- "Neftçi"yə qayıdışınız rəsmiləşib?
- Düzünü desəm, klubla müqaviləm bitməmişdi. Yəni onsuz da "Neftçi"də idim. Hətta bəzi məşqləri kənardan izləyirdim. Komanda ilə birgə idim. Elə oyunlar olurdu ki, bəzən öncədən, bəzən də matç bitəndən sonra paltardəyişmə otağına girirdim, uşaqları, Əsgər Abdullayevi təbrik edirdim. Yəni onu demək istəyirəm ki, komandanın yanında idim.
- Bəs köməkçi məşqçi olmaq təklifini sizə kim etdi?
- Baş məşqçi Əsgər Abdullayevdən. Onunla söhbətləşdik, bəzi məsələləri müzakirə etdik. Düşündüm ki, belə bir mütəxəssislə çalışmaq, eyni zamanda təhsilimi davam etdirmək özümə də faydalı olar. Çünki bu, mənim ancaq xeyrimə olacaq.
- Yəni, bir müddət öncə baş məşqçisi olduğunuz komandaya indi köməkçi məşqçi kimi qayıtmaq sizin üçün heç də problem olmadı?
- Mənim üçün bu, böyük məsuliyyətdir. Əksinə, Abdullayevin yanında çalışmaqla böyük təcrübə toplayacağam. Eyni zamanda PRO kateqoriyasını almaq üçün də vaxtım olacaq.
- İndiki "Neftçi" ilə sizin dövrünüzdəkini necə müqayisə edərdiniz?
- Bu yöndə hansısa paralellər aparmaq istəməzdim.
- Yəni, uğur qazana bilmədiyiniz bir komandaya qayıtdığınıza görə mümkün tənqidlərdən qorxmadınız?
- Dediyim kimi, Abdullayevdən təklif gəldi, mən də qəbul etdim. Fikrimcə, doğru qərar qəbul etmişəm. Çünki ondan öyrənəcəyim çox şey var. Hansısa gənc mütəxəssisin əlinin altında işləməyəcəyəm ki. Abdullayev vaxtilə Azərbaycan yığmasını da çalışdırıb. Onun rəhbərliyi altında futbol da oynamışam. Bu, mənim üçün yaxşı fürsətdir.
- "Neftçi"dən gedəndən sonra hansısa klubdan təklif almamışdınız?
- Mən nəyə nail olmuşam ki, hansısa klubdan təklif də alam? Heç bir klubdan dəvət gəlməyib.
- Sizcə, komandanızın avrokuboklara vəsiqə qazanmaq şansı var?
- Şans həmişə var. Qarşıda hələ çox oyun var. Odur ki, hər şey ola bilər.
