Əsgər Abdullayev: Öz hazırlıq planımız var, turnir barədə düşünmürük

"Neftçi"nin baş məşqçisi Əsgər Abdullayevin azerisport.az saytına müsahibəsi

- Samir Əliyevin sizin köməkçiniz olmasını rəhbərlik təklif etdi?
- Düzünü desəm, onun namizədliyini özüm təklif etdim. Sağ olsunlar ki, bundan imtina etmədilər.

- Əliyev dərhal razılaşdı? Çünki o, bir müddət öncəyə kimi komandanın baş məşqçisi idi...
- Onun tərəfindən heç bir problem olmadı. Samir kifayət qədər gənc mütəxəssisdir və bu iş onun ancaq xeyrinə olacaq.

- Mövsümün qalan dövrünə hazırlığın ilk günləri necə keçir?
- Hələ ki, futbolçular tibbi müayinədən keçirlər. Sabah isə ilk məşqimiz baş tutacaq. Yanvarın 11-dən toplanışa start verəcəyik.

- Xaricə getməyən klublarımız arasında təşkil olunması gözlənilən mini-turnirdə iştirak etmək sizin də planlarınıza daxildir?
- Dekabrda məşqçilərin görüşü zamanı AFFA-nın baş katibi Elxan Məmmədov belə bir turnir təşkil etmək arzularının olduğunu bildirmişdi. Mənim öz hazırlıq planım var. Bu turnir barədə heç düşünmürdük. Öz proqramımızla hazırlaşmaq istəyirik.

- Yəni "Neftçi" bu turnirdən imtina edəcək?
- Mən öz hazırlıq qrafikimizi tərtib etmişəm. Ümid edirəm ki, turnir bizim planlarımızla üst-üstə düşəcək və imtina etməyəcəyik.

- Müqavilə müddəti başa çatmış Mixal Peskoviçlə Jayronun aqibəti necə olacaq?
- Onlar böyük ehtimalla mövsümün sonunadək "Neftçi"də qalacaqlar. Amma komandanı tərk edənlər də olacaq. Yaxın günlərdə bundan xəbəriniz olacaq.

- Bəs heyəti gücləndirməyi düşünürsünüz?
- Biz gənc futbolçulara üstünlük verməyə çalışırıq. Əvəzedici heyətdən bir neçə futbolçunu əsas komandaya dəvət etmişik.

- Bu, heyəti gücləndirmək yönündə yeganə addımınız olacaq?
- Bu məsələ hələ müzakirə olunur. İstisna deyil ki, kənardan da transferlərimiz olsun.