Dmitri Nağıyev: Millidə mənə qarşı düzgün hərəkət etmədilər
Azərbaycanın gənclərdən ibarət yığma komandasının və Ukraynanın "Dnepr" klubunun müdafiəçisi Dmitri Nağıyevin azerisport.az saytına müsahibəsi
- Son dövrlər gənclər yığmamıza dəvət olunmursunuz. Niyə?
- Məni gənclər yığmasına çağırsalar da, AÇ-2017-nin seçmə mərhələ oyunlarında şans vermədilər. Yəqin ki, baş məşqçi məni komandasının oyun üslubuna uyğun hesab etmir. Mənə qarşı düzgün addım atmadılar. Son dövrlər isə ümumiyyətlə çağırmırlar.
- Niyə?
- Bunun cavabını ən yaxşı baş məşqçi bilər. Ondan soruşun.
- Maraqlıdır ki, oxşar vəziyyətlə Pavel Paşayev də üzləşir. O, əsas yığmamıza dəvət olunsa da, AÇ-2016-nın seçmə mərhələ oyunlarında meydana buraxılmadı. Yəni Ukrayna çempionatı o qədər zəifdir ki, bu ölkənin klublarında çıxış edən futbolçular milli komandalarımızda oynaya bilmirlər?
- Düzünü deyim ki, Paşayevi Ukrayna çempionatının oyunlarında görmürəm. Robert Prosineçki yaxşı mütəxəssisdir. O, meydana kimi buraxmaq lazım olduğunu yaxşı bilir. Ola bilsin ki, Ukrayna çempionatı son dövrlər zəifləyib, amma yenə də Azərbaycan çempionatından güclüdür. Məsələn, Azəbaycanda Donetsk "Şaxtyor"u, Kiyev "Dinamo"su səviyyəsində klub yoxdur.
- "Dnepr"in əvəzedici komandasında bu mövsüm 15 oyun keçirmisiniz. Öz çıxışınızı necə qiymətləndirərdiniz?
- Sabit oynamışam. Komandamız əvəzedicilərin çempionatında üçüncü yerdə gedir. Hesab edirəm ki, daha çox oynamaq üçün artırmaq lazımdrı.
- Belə çıxır ki, Dmitri Mixaylenko sizə güvənir...
- Bəli, baş məşqçimiz mənə güvənir. Buna görə şadam. Onun etimadını doğrultmağa çalışıram.
- Bəs əsas komandaya yüksəlmək şanslarınız barədə nə deyərdiniz?
- Hər bir gənc futbolçu kimi, mən də arabir "Dnepr"in əsas komandası ilə məşq edirəm. Amma mənə elə gəlir ki, əsas komandanın baş məşqçisi Miron Markeviç əvvəlki illərlə müqayisədə indi mənə az güvənir.
- Nə vaxtsa, sizi "Dnepr"in əsas heyətində görə biləcəyik?
- Şans həmişə var. Daha çox məşq etmək, özünü göstərmək lazımdır. Nə vaxtsa "Dnepr"dən getsəm, daha sabit çıxış etmək şansı qazanacağım kluba keçərəm.
- Təsadüfən, Azərbaycan klublarına keçmək barədə düşünmürsünüz?
- Xeyr, Azərbaycandan təklif almamışam. Ola bilər ki, kimsə istəyib. Amma mən bu barədə heç nə eşitməmişəm.
