Stepan Polyak: İnterdən maliyyə problemlərinə görə ayrıldım

"İnter"in sabiq yarımmüdafiəçisi Stepan Polyakın azerisport.az saytına müsahibəsi

- Stepan, bizdə olan məlumata görə, "İnter"dən ayrılmısınız. Bu, doğrudur?
- Bəli, "İnter"dən getmişəm.

- Niyə?
- Gedişimin bir neçə səbəbi var. Dəqiq olan bir şey var ki, artıq Xorvatiyadayam və "İnter"ə qayıtmayacağam.

- Klubun sizə borcu var?
- Xeyr, heç bir borcları yoxdur. Onlar bütün məvacibimi ödəyiblər.

- Pul deyilsə, sizin klubu tərk etməyinizə başqa nə səbəb ola bilər?
- Düzünü deyim ki, mən məhz maliyyə məsələsinə görə getməli oldum. Klubun bu baxımdan problemləri var. Gələcəkdə necə olacağı da bilinmir. İkinci səbəb baş məşqçi Zaur Svanadze ilə bağlıdır. O, hesab edir ki, mən "İnter"ə lazım deyiləm. O, elə düşünürsə, niyə bu klubda qalmalıyam?

- Sizinlə başqa yerli klublardan maraqlanan var?
- Heç bir klubla danışıq aparmamışam. Çünki mənimlə maraqlanan olmayıb. Azərbaycana qayıtmayacağam. Menecerim başqa ölkələrdə klub axtarır. Qış fasiləsi başa çatana qədər özümə yeni klub tapmaq istəyirəm.

- Svanadzenin etimadını qazanmaq o qədərmi çətin idi?
- Əslində, onunla yaxşı anlaşırdım. Çempionatın əvvəlində çox oynamasam da, sonradan mənə şans verməyə başladı. Fikrimcə, özümü yaxşı tərəfdən göstərməyi bacardım. Təəssüf ki, vəziyyət belə alındı və "İnter"i tərk etmək məcburiyyətində qaldım.

- "İnter"ə "Qarabağ"a qarşı çempionluq mübarizəsində kömək edə biləcəyinizi düşünürsünüz?
- Məncə, "Qarabağ" çempionatın qalibi olacaq. Onları indidən təbrik edə bilərəm. Qalan klublar isə ikinci yer uğrunda mübarizə apara bilərlər.

- "İnter"ə yeni prezident təyin olunub. Sizcə, bundan sonra klubun maliyyə vəziyyəti düzələ bilər?
- Yaxşı təyinatdır. Ümid edirəm ki, bütün problemləri həllini tapacaq. Son yarım ildə bütün çətinliklərə baxmayaraq, turnir cədvəlinin üst pillələrində qərarlaşmaq üçün əlimizdən gələni etdik. Bununla futbolda pulun hər şeyi həll etmədiyini isbatladıq. Kollektivimiz əsl peşəkarlıq və xarakter nümayiş etdirdilər.