Vəli Qasımov: Neftçi belə bir turnirdə iştirak etməyə hazırdır
"Neftçi"nin idman direktoru Vəli Qasımovun azerisport.az saytına müsahibəsi
- Komandanın qış hazırlıq planına tam aydınlıq gəlib?
- Prinsipcə, qış hazırlıq planımız olduğu kimi qalır. Sadəcə, bunun üçün heç bir yerə getməyəcəyik. Komanda yanvarı 4-5-də bir araya gələcək. Bir neçə yoxlama oyunu keçirəcəyik. Məsələn, yanvarın 23-də "Kəpəz"lə qarşılaşacağıq.
- "Neftçi"nin ölkə xaricinə təlim-məşq toplanışına yollanmaqdan imtinası birmənalı qarşılanmadı. Bu, mövsümün qalan hissəsinə daha yaxşı hazırlaşmağınıza problem yaratmayacaq?
- Problem olmayacaq. Burada da yüksək səviyyəli toplanış keçəcəyik. Əlbəttə, Antalyaya getməyimiz daha yaxşı olardı. Çünki orada daha çox sınaqçı-rəqib tapmaq olur. Amma nə etmək olar. Özümüzə Bakıda rəqib tapmalıyıq. Hansı ki, digər klubların da əksəri elə ölkə daxilində toplanış keçməyə qərar verib.
- AFFA ölkədə qalacaq klublar arasında mini turnir keçirmək fikrindədir...
- Bu barədə eşitmişəm. Belə bir turnir keçirsələr, yaxşı olar. Belə bir turnirdə iştirak etməyə hazırdır.
- Komandadan kimlərin gedəcəyi dəqiqləşib?
- Bu barədə konkret qərar yoxdur. Belə bir qərar bu həftə verilməlidir. Ancaq onu deyə bilərəm ki, Peskoviçlə Jayronun müqavilə müddəti başa çatıb. Amma hətta onların da məsələsi açıq qalır.
- Bəzi legionerlərdən də imtina etməyiniz mümkündür?
- Hələ ki, bu barədə düşünmürük. Hər şey o dərəcədə pis deyil ki, legionerlərdən imtina edək.
- Amma çox da maliyyə vəsaiti tələb olunmayan Türkiyə toplanışından imtina etdiniz...
- Bizim Türkiyəyə getməkdən imtina etməyimiz komandanın mövsümün qalan hissəsinə pis hazır olacağından xəbər vermir. Yüksək səviyyədə toplanış həyata keçiriləcək. Komandamız qarşıya qoyulan hədəfə çatmağa hazır olmalıdır.
- Manatın devalvasiyası bu mənada ciddi təsirini göstərməyəcək?
- Xeyr. "Neftçi" həmişəki kimi, avrokuboklara vəsiqə qazanmağa köklənib. Klubun yeni bazasının inşası davam edir. 2017-ci ildə onun istifadəyə verilməsi gözlənilir.
- Səlahət Ağayevin "Neftçi"yə keçəcəyi barədə xəbərlər doğrudur?
- Hələ bununla bağlı konkret danışığımız olmayıb. Amma hər şey mümkündür.
