Rauf Əliyev: Qarabağın bu mövsüm rəqibi yoxdur

"İnter"in hücumçusu Rauf Əliyevin azerisport.az saytına müsahibəsi

- "İnter" üçün geridə qalan ili necə dəyərləndirərdiniz?
- Qışa qədər klub çox ağır vəziyyətdə idi. Amma mənə elə gəlir ki, bütün problemlərə baxmayaraq, komandamız mövsümün geridə qalan dövrünü çox uğurlu keçirdi.

- Hansı oyun "İnter" üçün daha uğurlu, hansı uğursuz alındı?
- Belə oyunları ayrıca xatırlaya bilmərəm. Uğurlu oyunlarımız da çox oldu, uğursuzlar da. Bir sözü deyə bilərəm ki, hər oyunda uğurlu nəticə üçün mübarizə apardıq.

- "İnter" "Qarabağ"la çempionluq uğrunda mübarizə aparır, ya ağdamlıları indidən çempion elan etmək olar?
- Bircə şeyi dəqiq bilirəm ki, "Qarabağ"ın bu mövsüm doğrudan da rəqibi yoxdur. Bu komanda ilə rəqabət aparmaq çox çətindir. Çempionluq şansı ən çox məhz Ağdam klubundadır.

- Zədə bizim "İnter"də əvvəlki Rauf Əliyevi görməyimizə mane oldu...
- Nə etmək olar? Tədricən əvvəlki formamı bərpa etməyə çalışırdım. Amma təəssüf ki, ağır zədə aldım. Görünür, qismət belə imiş. Səbr etməli, yenidən əvvəlki formamı bərpa etmək üçün çalışmalıyam. Baxmayaraq ki, mənə çox çətin olacaq.

- Sizi nə vaxt yaşıl meydanda görəcəyik?
- Allahın köməyi ilə, təxminən 3-4 aydan sonra qayıdacağam.

- "İnter"in artıq yeni prezidenti var. O, sizinlə görüşüb, hansısa vədlər verib?
- Klub prezidentinin komanda ilə görüşü olmayıb. Amma o, əvvəllər bizim məşqlərimizə gəlirdi və təbii ki, futbolçularla da görüşürdü.

- "İnter"in maliyyə durumunun qaydasında olmadığı bəllidir. Üstəlik, siz də zədəlisiniz. Təsadüfən, buna görə pulunuzu kəsməyiblər ki?
- Xeyr. Bu klub üçün oynadığım vaxt zədələnmişəmsə, indi "İnter" niyə maaşımı kəsməlidir ki? Hər şey qaydasındadır, pulumu da alıram.