Mpenza problemi Neftçini avrokuboklarda iştirakdan məhrum edə bilər

"Neftçi"nin icraçı direktoru Elnur Məmmədov ötən gün baş tutan klubun Müşahidə Şurasının növbəti iclasından danışıb. Azerisport.az xəbər verir ki, o, öncə bunları söyləyib:

"İclasda klubun xərclərinin optimallaşdırılması ilə bağlı qərar qəbul olundu. Manatın devalvasiyasının mümkün davamiyyəti klubumuzun büdcəsinə mənfi təsir edəcək. Bu üzdən də risk etmək istəmirik".

Məmmədov Əsgər Abdullayevin baş məşqçi postunda saxlanılmasına da münasibət bildirib: "Biz bu təyinata qədər fəal şəkildə əcnəbi baş məşqçi axtarırdıq. Mən və klubun idman direktoru Vəli Qasımov iki gün ərzində İstanbulda beş əcnəbi mütəxəssislə danışıq apardıq. Onların adını açıqlamayacağam. Bütün analizlərimiz Müşahidə Şurasına təqdim olundu. Həmçinin Əsgər Abdullayevin hesabatı dinlənildi. Sonda isə belə qərara gəldik ki, Abdullayevi baş məşqçi postunda saxlayaq".

"Bu qərarla bağlı həlledici amil Abdullayevin komandanı çətin bir dövrdə götürməsi, sabit çıxışı təmin etməsi oldu. Əcnəbi məşqçinin təyinatı həm də əlavə xərc demək idi. Çünki o, yeni məşqçi korpusu, yeni futbolçular tələb edəcəkdi. Biz isə yerli futbolçularla irəli getməyi düşünürük. Həm də əcnəbi baş məşqçinin nəticə verib-verməyəcəyi dəqiq deyildi. Bu, bir risk olardı".

"Əsgər Abdullayevin PRO kateqoriyasına malik olmamasına gəlincə, biz də bilirik ki, bu, məşqçiyə avrokuboklarda iştirak etməyə problem yaradır. Bu məsələnin də həlli ilə məşğul olacağıq".

İcraçı direktor "Neftçi"nin sabiq futbolçusu Emil Mpenzaya olan borcundan da danışıb: "Biz bu borcun ödənilməsi üçün müəyyən yollar axtarırıq. Bunu sponsorların və əlavə resursların sayəsində ödəmək istəyirik. Bunu mümkün qədər tez həll etmək lazımdır. Əks halda avrokuboklarda oynamağa icazə verən lisenziyani almaqla bağlı problemlə üzləşə bilərik".