Fariz Nəcəfov: Nəinki əcnəbi, hətta yerli oyunçularımız da dollarla maaş alır

"Qəbələ"nin vitse-prezidenti Fariz Nəcəfov hər il təşkil etdikləri ənənəvi "Qəbələ Kuboku"ndan danışıb. Azerisport.az xəbər verir ki, o, bunları söyləyib:

"Turnir yayda keçiriləcək. Artıq bu yöndə hazırlığa başlamışıq. Turnirin 80 faiz iştirakçısı bəllidir. Qəbələyə adlı-sanlı klublar gələcək. Hazırda Cənubi Amerika komandalarından biri ilə danışıq aparırıq".

Nəcəfovun sözlərinə görə, onlar istefa verən Stenli Brardın əvəzində Qəbələ Futbol Akademiyasına yeni rəhbər axtarışlarını da davam etdirirlər: "Yeni direktor da əcnəbi olacaq. Mümkündür ki, ispan və ya hollandiyalı mütəxəssis gətirək. Brardın dövründə təməli qoyulan sistemlə də davam etmək istəyirik".

"Manatın devalvasiyasının təsirlərinə gəlincə, hələ klub prezidenti ilə görüşməmişəm. Bu üzdən də devalvasiyanın klubumuzun gələcək aqibətinə nə dərəcədə təsir edəcəyini bilmirəm. Təbii ki, bizə də təsirsiz ötüşməyəcək. Amma bu təsirin nə qədər olacağını bilmirik. Məsələn, əcnəbi futbolçularımıza maaşı dollarla ödəyirik, yerli oyunçulara isə manatla. Amma yerli futbolçular arasında da dollarla maaş alanlar var".