AFFA Klublar Komitəsinə yeni sədr seçildi

Bu gün - dekabrın 24-də “Boulevard Hotel Baku” otelində AFFA Klublar Komitəsinin növbəti iclası keçirilib. Azerisport.az xəbər verir ki, sözügedən iclasda sədr dəyişikliyi gerçəkləşib.

Bunun üçün iştirakçı klublar arasında səsvermə keçirilib. Nəticədə, AZAL-ın vitse-prezidenti Fikrət Hüseynov Klublar Komitəsinin yeni sədri seçilib. Altı klubun nümayəndəsi məhz ona səs verib. "Qəbələ" iki, "Sumqayıt" bir səs qazansa da, qalib ola bilməyib. "Qarabağ" klubundan isə bu toplantıda heç kim iştirak etməyib.

Xatırladaq ki, bu qurum yaranarkən "Xəzər Lənkəran"ın vitse-prezidenti Tuyqun Nadirov Klublar Komitəsinə sədr seçilmişdi. Bu dəfə isə o, öz namizədliyini verməyib.