Abdulla Abatsiyev: Buna görə mənə çox adam əsəbləşəcək

Azərbaycan yığmasının sabiq yarımmüdafiəçisi Abdulla Abatsiyev "İnter"lə yollarını ayırdıqdan sonra azerisport.az saytının suallarını cavablandırıb.

- Sizin Azərbaycan vətəndaşlığından imtina etməyə hazırlaşdığınız barədə xəbərlər doğrudur?
- Bəli, doğrudur. Bu qərarımın əsl səbəbini açıqlamaq istəməzdim. Amma burada keçirdiyim 7 ilə görə Azərbaycana sağ ol demək istəyirəm. Şadam ki, bu ölkənin şərəfini qorumaq mənə nəsib oldu. Azərbaycan karyeram mənə çox şey verdi. Bu ölkə mənim üçün doğmalaşıb və bu, həmişə belə də qalacaq. Burada çoxlu yaxşı dostum var. Bu üzdən belə bir qərar vermək mənim üçün çətin oldu. Amma həyat belədir.

- Bu qərarınız heç də birmənalı qarşılanmayacaq...
- Başa düşürəm ki, çox adam mənə əsəbləşəcək. Məsələn, deyəcəklər ki, gəldi, oynadı, getdi. Yəqin ki, onların yerində mən də olsaydım, eyni fikirləri söyləyərdim. Bu üzdən mən hər şeyi normal qarşılayıb, irəli getmək barədə düşünməliyəm.

- Azərbaycan vətəndaşlığından ona görə imtina edirsiniz ki, Rusiya vətəndaşı kimi bu ölkə klublarında problemsiz oynaya biləsiniz?
- Əlbəttə, bu, səbəblərdən biridir. Amma əsas deyil. Başqa bir səbəb şəxsidir, o barədə danışmaq istəmirəm.

- "Krılya Sovetov"a keçəcəksiniz?
- Mən heç bu xəbərin haradan yarandığını bilmirəm.

- İstənilən halda Rusiya klubuna keçəcəyiniz dəqiqdirmi?
- Bəli, Rusiya klublarından birinə keçməyi düşünürəm. Amma hələ tam dəqiqləşməyib. İstənilən halda Azərbaycana mənə verdiklərinə görə təşəkkürümü bildirirəm.