Səlahət Ağayev: İnterdə qalmaq istərdim, amma başqa klubdan təklif var
"İnter"in qapıçısı Səlahət Ağayev Topaz Premyer Liqasının 18-ci turu çərçivəsində "Xəzər Lənkəran"a qarşı keçirdikləri oyundan (2:0) sonra azerisport.az saytının suallarını cavablandırıb.
- "Xəzər Lənkəran" üzərindəki qələbəni necə şərh edərdiniz?
- Oyunun çox da çətin keçdiyini deməzdim. "Xəzər Lənkəran"ın vəziyyəti hər kəsə yaxşı bəllidir. Vacib qələbə qazandıq və nəticə ikinci pilləyə yüksəldik.
- Amma sizi çox az adam indi ikinci pillədə görəcəyini düşünərdi...
- Mən özüm də iki dövrədən sonra ikinci olacağımızı düşünmürdüm. Hansı vəziyyətə düşdüyümüzü hamı yaxşı bilir. Belə bir vəziyyətdə ikinci olmaq çox yaxşıdır. Ümid edirəm ki, bu mövqeyimizi mövsümün sonunadək qoruyacağıq.
- Yəqin bilirsiniz ki, "İnter" UEFA tərəfindən cəzalansa, qarşıdakı üç mövsümdən birini avrokuboklarda oynaya bilməyəcəksiniz...
- Bəli, xəbərim var. Amma bunun baş verəcəyinə inanmıram. Fikrimcə, bu cəzadan qaça biləcəyik.
- Sizdə belə bir əminlik haradandır?
- Məndə olan məlumata görə, klub rəhbərliyi bu məsələ ilə ciddi məşğul olur. İnanmıram ki, belə bir klub avrokuboklardan kənarda qalsın.
- "İnter"lə müqavilənizin müddəti başa çatır. Nə etməyi düşünürsünüz?
- Yaxın 2-3 günə məlum olacaq. Variantlarım var.
- "Neftçi"dən təklif var?
- "Neftçi"nin mənimlə maraqlandığını eşitməmişəm. Premyer Liqanın başqa klubundan təklif almışam. Amma ad açıqlamaq istəmirəm.
- Deməli, "İnter"dən gedəcəksiniz?
- Baş məşqçi qalmağımı istəyir. Özüm də qalmaq istəyərdim. Hər şey mənə burada nə təklif olunacağından asılıdır.
- Manatın devalvasiyası Azərbaycan futboluna təsir edəcəkmi?
- Təbii ki, müsbət təsir etməyəcək. Kimlər maaşını dollarla alırsa, onlara sərf edəcək.
