Əfran İsmayılov: Əsas odur ki, Qarabağ hazırda birinci yerdədir
"Qarabağ"ın yarımmüdafiəçisi Əfran İsmayılov Topaz Premyer Liqasının 18-ci turu çərçivəsində "Qəbələ"yə qarşı keçirdikləri oyundan (1:1) sonra azerisport.az saytının suallarını cavablandırıb.
- "Qarabağ" çoxsaylı qol imkanlarının yalnız birindən yararlana bildi. Niyə?
- Çətin oyun olacağını bilirdik. İki lider komandanın görüşü idi. Biz hücum edən tərəf idik. Amma yalnız matçın sonlarında bir qol vura bildik. Amma bir xal da yaxşı nəticədir. Nəzərə almaq lazımdır ki, hər iki komanda yorğun idi.
- Elə təəssürat yaranırdı ki, yorğunluqdan fasiləyə çıxmağı çox arzulayırsınız...
- Bəli, biz bu oyunu çox səbrsizliklə gözləyirdik. Çünki yaxşı nəticə qazanmaqla fasiləyə əla əhval-ruhiyyədə getmək istəyirdik.
- Qapınıza təyin olunan penalti barədə nə deyə bilərsiniz? Sizcə, hakim haqlı idi?
- Bəli, mən epizoda yaxın idim və yaxşı görürdüm. Təmiz penalti idi.
- "Qəbələ" ilə oyunda qol vursanız da, bütövlükdə komandanız yaratdığı qol vəziyyətlərini çox boşa verir. Bu, nə ilə əlaqədardır?
- Bunun nə ilə bağlı olduğunu baş məşqçimiz deyə bilər. Qurban Qurbanov nəyi necə etmək lazım olduğunu daha yaxşı bilir. Məşqlərdə də bunun üzərində çalışırıq. Amma nədənsə oyunlarda alınmır. Yanvarda təlim-məşq toplanışına gedəcəyik. Orada qol epizodlarından daha yaxşı yararlanmaqla bağlı çalışmaq imkanımız olacaq.
- "Qarabağ"ın son dövrlər qələbə qazana bilməməsi arxayınlıqdan irəli gəlmir ki?
- Arxayınlıq yoxdur. Əsas odur ki, xal qazanmağa davam edirik. Mümkündür ki, müəyyən eniş var. Uşaqlar yorulublar. Hər oyuna demək olar ki, oxşar heyətlə çıxırıqı. Bu amil öz sözünü deyir. Başqa heç bir səbəb ola bilməz.
- Azarkeşlər son dövrlər sizin oyununuzdan narazıdır...
- Ola bilər. Amma mən "Qarabağ"a faydalı olmaq üçün əlimdən gələni edirəm. Mən ilk növbədə komandaya və baş məşqçiyə faydalı olmağa çalışıram.
- "Qarabağ" bu il istədiklərinə nail ola bildi?
- Təəssüf ki, Avropa Liqasının pley-off mərhələsinə çıxa bilmədik. Amma əsas odur ki, çempionatda birinci yerdə gedirik. Bu tempdə də davam etməliyik.
