Aleksey Qay: Qarabağa qarşı daha yaxşı oynaya bilərdik
"Qəbələ"nin yarımmüdafiəçisi Aleksey Qay Topaz Premyer Liqasının 18-ci turu çərçivəsində "Qarabağ"a qarşı keçirdikləri oyundan (1:1) sonra azerisport.az saytının suallarını cavablandırıb.
- Matçla bağlı nə deyə bilərsiniz?
- Qələbə qazana bilərdik. Amma əksinə oldu. Bütövlükdə, nəticədən razıyam. Oyuna gəlincə, biz yaxşı çıxış etdik, qol vəziyyətlərimiz də oldu. Daha yaxşı oynaya bilərdik. "Qarabağ" topla yaxşı davranmağı bacaran komandadır.
- İkinci hissədə əks-hücumlarda qol vurmaq şansınız olsa da, sanki sizdə yorğunluq var idi...
- Kənardan necə göründüyümüzü bilmirəm. Bizim işimiz meydanda sonadək mübarizə aparmaqdır.
- Yəqin ki, Dodo penaltini qola çevirsəydi, hər şey fərqli bitəcəkdi. Siz necə düşünürsünüz?
- Penaltini mən vuracağım halda da nə baş verəcəyini heç kim dəqiq deyə bilməz. Ola bilsin ki, mən də vurmağı bacarmazdım. Futbol belədir.
- "Qəbələ" bu oyunda iki xal itirdi, ya bir xal qazandı?
- Fikrimcə, "Qəbələ" iki xal itirdi.
- "Qəbələ"nin son qələbələri 8-ci və 15-ci turlara təsadüf edir. Problem nədədir?
- Mən hansısa problem olduğunu deməzdim. Futbolda belə hallar olur. Çünki komanda bütün oyunlarda qələbə qazana bilməz. Həm də nəzərə almaq lazımdır ki, biz gənc komandayıq. Biz çempionatda yüksək yerlər uğrunda mübarizə aparırıq və bu mübarizəni sonadək davam etdirəcəyik.
- Azərbaycanlı jurnalistlər arasında aparılan sorğuya görə ölkəmizdə çıxış edən ən yaxşı legioner futbolçu "Qarabağ"ın yarımmüdafiəçisi Riçard Almeyda seçilib. Amma o, öz çıxışında ən yaxşı legioner sizi hesab etdiyini bildirib...
- Almeyda bu ada layiqdir. Çox yaxşı futbolçudur, komandasının lideridir. Fikrimcə, bu seçimdən heç kim narazı qala bilməz. Onu təbrik edirəm.
