Vaqif Sadıqov: Hədəf bu gənc uşaqları əsas milli üçün hazırlamaqdır
AFFA Məşqçilər Komitəsinin rəhbəri Vaqif Sadıqovun azerisport.az saytına müsahibəsi
- Artıq AFFA U-18 və U-20 yığmalarının heyətini açıqlayıb. Bəs bu komandalara kim baş məşqçilik edəcək?
- Orada baş məşqçi olmayacaq. Bu komandalar əsas millimizin baş məşqçisi Mahmud Qurbanovla Elxan Abdullayevə tapşırılıb. Onların vəzifəsi millidəki fəlsəfəni gənc oyunçulara aşılamaqdır. Amma Mahmudla Elxan bu işdə tək olmayacaqlar. Onlarla birgə U-21-in baş məşqçisi Yaşar Vahabzadə və U-19-un çalışdırıcısı Nazim Süleymanov da işləyəcək. Yəni bu iki baş məşqçi ilə Məşqçilər Komitəsinin üzvləri kənardan hazırlıq prosesini izləyəcək. Hədəf isə bu uşaqları tədricən əsas milli komanda üçün hazırlamaqdır.
- Azərbaycan futbolu üçün 2015-ci il demək olar ki, başa çatıb. Bu il sizin üçün daha çox nə ilə yaddaqalan oldu?
- İki klubumuzun - "Qarabağ"la "Qəbələ"nin Avropa Liqasının qrup mərhələsindəki çıxışı böyük uğurdur. Bu ili əsas millimiz üçün də uğurlu sayıram. Bu, gələcəyə ümidlə baxmağa əsas verir.
- Amma xoşa gəlməyən məqamlar da var. Məsələn, iddialılardan olan "Xəzər Lənkəran" indi autsayderdir...
- Əlbəttə, həm sevindirici, həm də üzücü məqamlar var. Amma həyatda da belədir. Cənub təmsilçisinin belə bir vəziyyətə düşməsini heç vaxt istəməzdim. Bu komanda həmişə yüksək yerlər uğrunda mübarizə aparmalıdır. İndi "Xəzər Lənkəran" üçün ən vacib məsələ belə bir çətin vəziyyətdə ayaqda qala bilməkdir.
- Hazırda əsas müzakirə mövzularından biri yığmamızın iki aparıcı üzvü - Kamran Ağayevlə Rahid Əmirquliyevin karyerasını harada davam etdirəcəyidir...
- Dəqiq demək olar ki, bu iki futbolçu klubsuz qalmayacaq. Bu, birmənalıdır. Yeganə sual doğuran məqam onların Azərbaycanda və ya xaricdə oynayacağıdır. Ağayevlə Əmirquliyev istənilən komandada oynamağa, rəqabəti artırmağa qadir futbolçudur.
- Premyer Liqanın cari mövsümünün sürpriz komandası - "Zirə" barədə nə deyə bilərsiniz?
- "Zirə" yerli və əcnəbi futbolçulardan ibarət yaxşı kollektiv formalaşdırıb. Komanda çox yaxşı, baxımlı oyun sərgiləyir. Ona görə də hazırda ikinci pillədə gedirlər.
- Sizcə, "Qəbələ"nin son dövrlərdəki uğursuz çıxışı nə ilə bağlıdır?
- Fikrimcə, qazandığı təcrübə bu komandanın qələbə qazanmağa başlamasına kömək edəcək. Məncə, onların belə uğursuz çıxışının səbəbi iki cəbhədə mübarizə aparmasına görə idi. "Qəbələ"nin çox böyük potensialı var. Onlar bu vəziyyətdən çıxış yolu tapacaqlar.
- "Qarabağ"ın liderliyini inamla qoruması barədə nə deyərdiniz?
- Bu, tam gözləniləndir. Amma "Qəbələ"nin liderdən bu qədər geri qalacağını məncə, heç kim gözləmirdi. Yəqin ki, bu komanda ilin son oyununda aradakı xal fərqini azaltmağa çalışacaq.
