Rail Məlikov: Neftçiyə qarşı indi heç bir prinsipiallıq qalmayıb
AZAL-ın kapitanı Rail Məlikov Topaz Premyer Liqasının 17-ci turu çərçivəsində "Neftçi"yə qarşı keçirdikləri oyundan (1:0) sonra azerisport.az saytının suallarını cavablandırıb.
- Matçla bağlı nə deyə bilərsiniz?
- "Neftçi" ilə oyunların hamısı çətindir. Bu klubun təkcə adı çox şeydən xəbər verir. "Neftçi" həm də flaqmandır. Biz bu oyuna maksimum ciddi hazırlaşmışdıq. Baş məşqçi bizə nələri tapşırmışdısa, onları yerinə yetirmək üçün əlimizdən gələni etdik. Qol vurandan sonra əks-hücumda oynamağa başladıq. Bu da öz bəhrəsini verdi.
- Bu mövsüm "Neftçi"dən altı xal almısınız...
- "Neftçi" artıq əvvəlki komanda deyil. Bizim üçün isə adi oyunlardan biri idi. Düzdür, səfərdə çıxış edirdik, çətinliklə üzləşdik. Amma bu mövsüm istənilən komandadan xal almaq olar. Biz də bu görüşdə düzgün oynadıq və qələbə qazandıq.
- Hansı "Neftçi"ni daha güclü hesab edirsiniz: birinci dövrədə qarşılaşdığınızı, ya indikini?
- Xüsusi bir dəyişiklik görmədim. Bəzi oyunçuları çıxmaq şərtilə, demək olar ki, həmin heyət idi.
- AZAL çox vaxt "öldürürdü"...
- Bu, futboldur. Biz 0:1 hesabıyla məğlub durumda olsaydıq, eyni şeyi "Neftçi" də edərdi. Futbolun yazılmamış qanunları var. Yeri gəlmişkən, bəzi epizodlarda futbolçularımız zədə aldı. Rəqib futbolçulara "feyr-pley"ə əməl etdiklərinə görə təşəkkürümü bildirirəm.
- Yəqin ki, son dəqiqədəki epizod istisna olmaqla...
- Düzdür, haqlısınız Ruslan Nəsirli yıxılıd, amma onlar topu meydandan çıxarmadılar. Amma son dəqiqələr idi, məğlubiyyətdən qaçmaq istəyirdilər.
- Bu dəfə yenidən Ruslan Qurbanova qarşı oynadınız. Birinci dövrədəki oyundan sonra ciddi probleminiz yaranmışdı. Bu dəfə necə oldu?
- Hər şey keçmişdə qalıb. Biz elə o vaxt zəngləşdik, görüşdük, hər şeyi yoluna qoyduq. O, mənim kiçik qardaşımdır. Mən "Neftçi"də oynayanda o da bizimlə idi. Bir-birimizi başa düşdük. Hər şey qaydasındadır.
- Keçmiş komandanıza qarşı hansısa prinsipiallıq var idi?
- Əvvəlki "Neftçi"dən heç nə qalmayıb. Mən bunu həm rəhbərlik, həm də oyunçular baxımından deyirəm. "Qəbələ"də oynayanda hansısa prinsipiallıq qalmışdı. Amma indi o da yoxdur. Bizim prinsipimiz rəhbərlikdəki bəzi insanlara qarşı olur. Bura Sadıq Sadıqovu aid etmirəm. Kimləri nəzərdə tutduğumu özləri yaxşı bilir. İndi isə heç bir prinsipiallıq yoxdur. Çıxıb öz futbolumuzu oynadıq. "Neftçi"yə də uğurlar arzulayıram, orada da futbolçu qardaşlarımız çıxış edir.
- Növbəti turda sizi "Zirə" ilə oyun gözləyir. Hədəfiniz nə olacaq?
- Qələbəyə köklənmişik. Evdə oynayacağımız üçün ancaq üç xal barədə düşünəcəyik.
