Ponomaryov: 2015-ci ilin məşqçisi Qurbanov, ən yaxşı oyunçusu Sadıqovdur
Azərbaycan millisinin sabiq baş məşqçisi İqor Ponomaryov azerisport.az saytına müsahibəsində 2015-ci ilin yekunları, ölkə çempionatı barədə danışıb.
- Başa çatmaqda olan 2015-ci ili Azərbaycan futbolu üçün necə qiymətləndirirsiniz?
- Bu suala müxtəlif istiqamətdə cavab vermək olar. İki klubun Avroliqanın qrup mərhələsinə düşməsi böyük uğur oldu. Amma çempionatın səviyyəsində yüksəliş olmadı. Ölkə futbolunu inkişaf etdirmək üçün başlıca amillərdən biri çempionatın səviyyəsini yüksəltməkdir. İndi təəssüf ki, rəqabət aşağıdır. Əvvəlki illərdə olduğu kimi, çempionluq uğrunda mübarizə gərgin görünmür. Digər tərəfdən 2015-ci ildə xarici ölkə çempionatlarına yollanan futbolçumuz da olmadı.
- 2015-ci ilin yekunlarına nəzər salarkən hansı həmkarınızı ilin məşqçisi elan etmək olar?
- Sorğu keçirirsinizsə, mən Qurban Qurbanova səs verərdim. Bu insan ardıcıl ikinci il nəticə göstərdi. "Qarabağ" Avropa Liqasında da yaxşı mübarizə sərgilədi. Komanda çempion oldu, kubok qazandı. Ən əsası sabit nəticə verdi. Qurban Qurbanov çox yaxşı məşqçidir. Bunu nəticələrlə sübut edir. Üzərində çalışır və hər il azarkeşləri sevindirir. Fikrimcə, ötən il üçün Azərbaycanda ən yaxşı məşqçi odur.
- Bəziləri Roman Qriqorçukun adını çəkir. Çünki, "Qəbələ" ilk dəfə ardıcıl dörd mərhələ keçməklə qrupda düşdü..
- "Qəbələ" doğrudan böyük nəticə göstərdi. Amma ilin məşqçisi üçün bir-iki ay deyil, il boyu nəticə olmalıdır. Qrupa düşdü, amma sona qədər normal oyun sərgiləmədi. Çempionat matçlarında da o qədər fəal olmadı. İki cəbhədə yarışmaq klub üçün ciddi problemlər yaratdı. "Qarabağ" isə ikinci dəfə qrup mərhələsinə vəsiqə qazandı. Son tura qədər komandanın qrupdan çıxmaq şansı qalırdı. "Qəbələ"dən fərqli olaraq, "Qarabağ" il boyu yaxşı oynadı.
- 2015-ci ilin futbolçusu kimi hesab edirsiniz?
- Bu il yeni kəşflər olmadı. Bəzi ötən illərin yaxşıları isə gerilədi. Bu mənada ilin futbolçusu kapitan Rəşad Sadıqovu hesab edərdim. Həm millidə, həm klubda fədakarlıqla seçildi. Avrokuboklarda lider kimi özünü göstərdi. Ona görə Sadıqov ilin ən yaxşısıdır.
- Sadıqov Azərbaycan millisində 100-dən çox oyun keçirib. Çoxları düşünür ki, klub karyerasını başa vursa, "Qarabağ" üçün çətin olacaq...
- Rəşad doğrudan yaxşı futbolçudur. Onun istənilən qərarına hörmətlə yanaşmalıyıq. Karyerasını başa vursa, bunu qəbul etməliyik. Bilirsiniz, əvəzolunmaz futbolçu yoxdur. Maradona futboldan getdi, Messi gəldi. Sabah Messi olmayacaq, başqası meydanı zəbt edəcək. "Qarabağ"da hər bir futbolçu klub üçün vacibdir. Lakin əvəzolunmaz yoxdur.
- Vaxtı ilə futbolçusu olduğunuz "Neftçi"də Samir Əliyev istefa verdi. Onun əvəzinə Əsgər Abdullayev təyin olundu. Onun rəhbərliyi altında komanda yaxşı nəticə qazansa belə, rəhbərlik əcnəbi məşqçi axtarışını davam etdirir...
- İndi Azərbaycan futbolunda peşəkar olmayan insanlar çoxdur. Belə deyim var, "başqasının bağşasındakı çiçək daha ətirli olur". Razıyam, Samir Əliyevdə bir qədər alınmadı. Amma təəssüflənməyə dəyməz. Həmin dövr "Neftçi"də işləmək asan deyildi. Onun gələcəyi qarşıdadır. Yaxşı məşqçi olacağına inanıram. Əcnəbi məşqçi məsələsinə gəlincə, rəhbərlik qərar qəbul edir. Onların işinə qarışmaq istəməzdim. Mənim fikrimə gəlincə, Abdullayev qalmalıdır. O, təcrübəlidir, futbolumuzu bilir. Qazandığı nəticələr təsadüfi deyil. Əcnəbi məşqçi əlavə büdcə istəyəcək, yeni futbolçular tələb edəcək. Olmaz ki, elə bu komandanı gücləndirsinlər və Abdullayev ilin sonuna qədər komandada qalsın? Bu məşqçi komandanı yeni səviyyəyə qaldırmağı bacaracaq.
- Yeni mövsüm Premyer Liqada klubların sayını artırmaq istəyirlər. Sizcə, 14 və ya daha çox komandayla çempionat daha maraqlı olacaq?
- Daha çox klub daha çox xərc, əlavə nəqliyyat, səfərlər, oyunlar deməkdir. Amma keyfiyyət tam başqadır. Çempionatın səviyyəsini yüksəltmək üçün indiki reqlament pis deyil. 10 komanda dörd dövrəli sistemdə yaxşı mübarizə nümayiş etdirmək olar. Amma rəqabət yoxdur. Yalnız iki komanda liderlik uğrunda yarışır. O birilər üçlüyə düşməyə cəhd göstərir. Belə çempionatda çıxış edən klublardan avrokuboklarda daha böyük nəticə gözləmək düzgün deyil. Avrokubokda il ərzində 6-7 oyun keçirirsən. Axı çempionat matçlarında da rəqabət görməlisən.
