Məhəmməd Qurbanov: Bu, indiki baş məşqçinin əvvəlkindən daha yaxşı olduğunu deməyə əsas vermir
"Neftçi"nin hücumçusu Məhəmməd Qurbanovun azerisport.az saytına müsahibəsi
- Son turda qarşılaşdığınız "Qəbələ" üzərində qazanılan 1:0 hesablı qələbə ilə bağlı nə deyə bilərsiniz?
- Dağlıq ərazidə oynamaq çox çətin idi. Tam fərqli hava şəraitir. Belə bir iqlimə uyğunlaşmaq çətin oldu. Amma yaxşı ki, birinci hissədə qol vurmağı bacardıq. Rəqibə qapımız qarşısında təhlükəli vəziyyətlər yaratmağa imkan vermədik.
- Siz start heyətdə tez-tez görünməsəniz də, bu oyunda ilk dəqiqələrdən oynadınız. Həyəcan yox idi?
- Xeyr. Oyundan bir gün öncə baş məşqçi oynayacağımı bildirmişdi. Özümü yaxşı tərəfdən göstərmək istəyi ilə meydana çıxmışdım. Çünki start heyətdə meydana çıxmaq imkanı tez-tez ələ düşmür.
- İki ay öncə sizə "Neftçi"nin dörd oyuna 10 xal toplayacağını desəydilər, inanardınız?
- Biz həmişə qələbə qazanmaq istəyirik. Amma mövsümün əvvəlini necə keçirdiyimizi nəzərə alsaq, yəqin ki, buna təəccüblənərdim. Tez-tez xallar itirirdik. Çox şadam ki, son dövrlər daha az xal itkisinə yol veririk. "Zirə" ilə heç-heçəni nəzərə almasaq, bütün görüşlərdə qələbə qazanmışıq.
- Əsgər Abdullayev əvvəlki baş məşqçiniz Samir Əliyevdən nə ilə fərqlənir?
- Hər bir məşqçinin futbola öz baxışı var. Həm Əliyevlə, həm də Abdullayevlə məmnuyyətlə çalışıram. Sadəcə, indi nəticə də var. Şadam ki, böhrandan çıxa bildik. Amma bu, hansısa baş məşqçinin yaxşı, hansınısa pis olduğunu deməyə əsas vermir.
- "Qəbələ" ilə oyun sizin üçün nə dərəcədə prinsipial idi?
- Birinci dövrədə onlara məğlub olmağa layiq deyildik. Bu dəfə isə qələbə qazanmaqla üstün olduğumuzu göstərdik. Çempionatın iki liderinə - "Qarabağ"la "Qəbələ"yə qol buraxmadan qalib gəlmişik. Bizi qarşıda daha iki prinsipial oyun gözləyir.
- AZAL və "Kəpəz"lə oyunların nəyi prinsipialdır?
- İlk dövrədə AZAL-a uduzmuşduq, bu dəfə qələbə qazanmaq istəyirik. "Kəpəz" isə "Neftçi"nin tarixi rəqiblərindəndir. Ona görə bu klubların duelləri də prinsipial əhəmiyyət daşıyır. Hər iki görüşdə qələbə qazanmaq istəyirik.
