Millimizin DÇ-2016-ya vəsiqə yolundakı potensial rəqibləri bəllidir

2016-cı ildə Kolumbiyada təşkil olunacaq dünya çempionatının pley-offçuları bəlli olub. Azerisport.az xəbər verir ki, mundiala 7 vəsiqə uğrunda mübarizə aparacaq 14 komanda arasında Azərbaycan millisi də var.

Digər kollektivlər isə Belarus, Ukrayna, Macarıstan, Rusiya, Serbiya, İspaniya, Hollandiya, Qazaxıstan, Sloveniya, Portuqaliya, Polşa, İtaliya və Slovakiyadır.

Pley-off mərhələsinin püşkatma mərasimi 2016-cı il fevralın 12-də Serbiyanın paytaxtı Belqradda təşkil olunacaq. Bu mərhələnin oyunları isə martın 22-də və aprelin 12-də keçiriləcək.

Qeyd edək ki, püşkatma zamanı qrup birincisi olan kollektivlər pley-offa qrup ikincisi kimi yüksələn komandalarla üz-üzə gələcək. Sadəcə, əsas seçmə mərhələdə eyni qrupda mübarizə aparmış yığmaların yenidən üz-üzə gəlməsinə imkan verilməyəcək.

Pley-off mərhələsinin 7 qalibi Avropanı dünya çempionatında təmsil edəcək. Azərbaycan yığması isə ilk dəfə dünya çempionatının final mərhələsinə vəsiqə qazana bilər. Millimizin potensial rəqibləri bunlardır: Serbiya, Hollandiya, Sloveniya, Polşa və Slovakiya.