Prosineçki: Belə bir rəqiblə heç-heçə uğurdur
Azərbaycan yığmasının baş məşqçisi Robert Prosineçki Topaz Premyer Liqasının 16-cı turu çərçivəsində izlədiyi "Zirə" - "Qarabağ" oyunundan (0:0) sonra azerisport.az saytının suallarını cavablandırıb.
- "Zirə" - "Qarabağ" oyunu necə idi?
- Oyun heç də xoşuma gəlmədi. Çünki qol vəziyyətləri çox az oldu. "Zirə"ni belə bir nəticə münasibətilə təbrik etmək olar. Çünki hazırda Azərbaycanın güclü komandasına qarşı oynayırdılar. Belə bir rəqiblə heç-heçə uğurdur. Baxmayaraq ki, "Qarabağ" bu gün bütün keyfiyyətlərini nümayiş etdirə bilmədi.
- Berti Foqtsa yığmamızı qışda təlim-məşq toplanışına aparsa da, siz bundan imtina etmisiniz. Bunun səbəbi nədir? Yoxlama oyunu olmayacaq?
- Futbolçuları klublarının Antalya toplanışında izləyəcəyəm. Yığmanın mart ayında toplanışı nəzərdə tutulub. Təbii ki, həmin vaxt yoxlama oyunu da olacaq. Danışıqlar davam edir. Ona görə hansı komanda ilə qarşılaşacağımızı deyə bilmərəm.
- DÇ-2018-in seçmə mərhələsindəki rəqiblərimizdən üçü - Almaniya, Rusiya və Şimali İrlandiya AÇ-2016-nın final mərhələsində iştirak edəcək. Onların qitə birinciliyindəki çıxışını canlı izləmək fikriniz var?
- Əlbəttə, izləyəcəyəm. Fransaya gedəcəyəm və rəqiblərimizin oyunlarını stadiondan izləməyə çalışacağam.
- Deyilənə görə, "Xəzər Lənkəran"ı tərk etməyə hazırlaşan Rahid Əmirquliyev qışda Xorvatiyanın "Riyeka" klubuna keçəcək və bu işdə vasitəçi sizsiniz...
- Təəssüf ki, "Xəzər Lənkəran" hazırda maliyyə problemlərindən əziyyət çəkir. Rahidin "Riyeka"ya keçidi məsələsinə gəlincə, bu barədə heç nə deyə bilmərəm. Mən sadəcə, onun formada qalacağı, daha da artıracağı yaxşı komandada oynamasını istəyərdim. Bu, məni çox sevindirər.
- Siz özünüz ona Xorvatiya klubuna keçməyi məsləhət görmüsünüz?
- Mənim "Riyeka" ilə heç bir əlaqəm olmayıb. Məndən bu barədə heç kim heç nə soruşmayıb. Mənim də bu məsələdə adımın hallandığını mətbuatdan öyrənmişəm. Amma bu, elə deyil. "Riyeka"dan mənə zəng gəlsə, təbii ki, Rahidin problemsiz oynayacağını və komandaya fayda verəcəyini deyərəm.
