Vitali Borisov: Xorvatiya ilə oyunda heç-heçə barədə düşünməyəcəyik

Futzal üzrə Azərbaycan yığmasının liderlərindən biri - Vitali Borisov dünya çempionatının seçmə mərhələsi çərçivəsində bu gün Xorvatiyaya qarşı keçirəcəkləri həlledici oyun öncəsi azerisport.az saytının suallarını cavablandırıb.

- Seçmə mərhələdəki ikinci oyunda Belarusa da 7:2 hesabıyla qalib gəldiniz. Həmin matçla bağlı nə deyə bilərsiniz?
- Çox maraqlı oyun oldu. İlk yarının sonlarında 3 qol vurduq. Belə böyük hesabla qələbə qazanmağımızda da məhz bunun böyük rolu oldu.

- Yəqin ki, 7:2 hesabı sizin üçün gözlənilməz oldu. Çünki matçdan öncə rəqibin çox güclü olduğunu deyirdiniz...
- Düzünü deyim ki, mən bu hesabla qalib gələcəyimizi gözləmirdim. Amma qələbə qazanacağımıza inanırdım.

- Həm İsveç, həm də Belarusa nəyin hesabına darmadağınla qalib gəldiniz?
- Digər oyunlarla müqayisədə biz bu görüşlərdə daha dəqiq oynadıq, az səhvə yol verdik, ələ düşən imkanlardan yaxşı yararlandıq. Hətta deyərdim ki, realizasiya baxımından bizdə hər şey yüksək səviyyə oldu.

- Yəqin ki, bu iki darmadağından sonra Osiyekdə hər kəs sizi Xorvatiya ilə qarşılaşmanın favoriti hesab edir...
- Düzünü deyim ki, burada bizim haqqımızda nə danışdıqlarını bilmirəm. Amma mənə elə gəlir ki, xorvatlar üçün ölkələrinin yığması həmişə favoritdir.

- Əvvəlki görüşlərdəki uğurun davamını gətirə biləcəksiniz?
- Xorvatiya heç də zəif komanda deyil. Heyətlərində kifayət qədər yaxşı oyunçu var. Amma biz də tam gücümüzü qoyacağıq. Bu oyunda qələbə bizə reytinq xallarımızı artırmaq baxımından da çox vacibdir. Belarus bu rəqibə qalib gəlmişdi. Niyə biz də eyni uğura imza atmayaq?

- Qrupda birinci yeri tutmaq üçün sizə heç-heçə də kifayətdir...
- Bəli. Hətta minimal hesablı qələbə də bizi qrup birincisi edəcək. Amma biz heç-heçə və məğlubiyyət barədə düşünmürük. Biz ancaq qələbə barədə düşünürük. Daha sonra pley-off oyunları olacaq. Allah eləsin ki, orada da uğur qazanaq.