Ansi Aqolli: Fransada həm də Qarabağı təmsil edəcəyəm
Albaniya yığmasının və "Qarabağ"ın müdafiəçisi Ansi Aqollinin azerisport.az saytına müsahibəsi
- Albaniya yığması Avropa çempionatının final mərhələsində Fransa, İsveçrə və Rumıniya ilə bir qrupda yer aldı. Qrupunuzu necə qiymətləndirərdiniz?
- Heç bir narahatlıq yoxdur. Hər şey qaydasındadır. Aydın məsələdir ki, Avropa çempionatının finalındakı hər bir komanda güclüdür. Şadam ki, belə bir qrupa düşmüşük. Şanslar barədə yalnız onu deyə bilərəm ki, futbolda mümkünsüz heç nə yoxdur. Hər şey ola bilər. İtiriləsi də heç nə yoxdur. Fransaya əla əhval-ruhiyyədə gedəcəyik. Ən yaxşı futbolumuzu göstərib, yaxşı nəticələr qazanmağa çalışacağıq.
- İlk oyununuzu İsveçrəyə qarşı keçirəcəksiniz...
- Çox yaxşı komandadır. Amma biz istənilən halda meydana uğurlu nəticə üçün çıxacağıq.
- Albaniya sürpriz edə bilər?
- Dediyim kimi, futbolda mümkünsüz heç nə yoxdur. Biz də Fransada bunu isbatlamağa çalışacağıq.
- Qrupdakı rəqiblərin hansından daha çox ehtiyatlanırsınız?
- Heç bir komandadan ehtiyatlanmaq lazım deyil. Amma fikrimcə, qrupun favoriti Fransadır. Çox güclü komandadır. Onlar həm də doğma meydanda oynayacaqlar. İsveçrəyə qarşı oyun isə daha maraqlı olacaq. Bunu bir növ Albaniya derbisi də adlandırmaq olar.
- "Qarabağ"ın Avropa çempionatında oynayan ilk futbolçusu kimi tarixə düşməyi bacaracaqsınız?
- Bəli. Bu, həyatımın ən həyəcanlı anlarından biri olacaq. Çox şad olacağam. AÇ-2016-da həm də "Qarabağ"ı təmsil edəcəyəm. Albaniya yığmasının əksər futbolçuları tanınmış klublarda çıxış edir. Bəzisi İtaliya A Seriyasında, Almaniya Bundesliqasında, Fransa Liqa 1-də oynayır. Mən isə "Qarabağ"ın üzvüyəm və Fransada klubumu təmsil etməyimlə fəxr hiss edəcəyəm.
- Yəqin ki, "Qarabağ"a keçidinizi karyeranızın ən uğurlu addımı hesab edirsiniz. Bu komanda sizin üçün uğurlu olub?
- "Qarabağ"da oynadığım üçün çox şadam. Komandamın uğurları üçün həmişə mübarizə aparmağa hazıram.
