Alan Lalin: Qarabağ və Qəbələnin Avroliqadakı uğurları məni də sevindirir
2009-2011-ci illərdə "Xəzər Lənkəran"da çıxış etmiş honduraslı hücumçu Alan Lalinin azerisport.az saytına müsahibəsi
- Hazırda Honduras çempionatında çıxış edirsiniz. "Platense"dəki işləriniz necə gedir?
- Optimal formamı bərpa etməyə çalışıram. Ona görə də bu klubun dəvətini qəbul etdim. Komandanın lideri olmağımı təklif etdilər. Hər şey normaldır.
- Azərbaycan futbolu ilə maraqlanırsınız?
- Əlbəttə. Bilirəm ki, "Qarabağ"la "Qəbələ" Azərbaycanı Avropa Liqasında təmsil edir. Düzünü deyim ki, bu komandaların uğurlu çıxışı məni də çox sevindirir. Çünki vaxtilə Azərbaycan çempionatında çıxış etmişəm. Buna görə bu ölkə mənə doğmadır.
- "Xəzər Lənkəran"dakı günlərinizi xatırlayırsınız?
- Orada hər şey çox gözəl idi. Bu komandada unudulmaz günlərim olub. Eyni zamanda "Xəzər Lənkəran"da çıxış etməklə böyük təcrübə toplamış oldum.
- "Xəzər Lənkəran"dakı hansı oyun sizin üçün daha yaddaqalan olub?
- "Xəzər Lənkəran"dakı hər bir oyun mənim üçün unudulmazdır. Amma hamısından çox "Qəbələ"yə qarşı keçirdiyimiz oyun yaddaqalandır. Lənkəranda oynayırdıq. Həmin görüş yəqin ki, karyeramın ən yaxşı oyunlarından biri idi. Səhv etmirəmsə, 2010-cu ildə idi. O vaxt biz 4:1 hesabıyla qalib gəldik.
- Xəbəriniz var ki, keçmiş klubunuz indi ciddi problemlərlə üz-üzədir?
- Bəli, xəbərim var və bundan çox məyusam. "Xəzər Lənkəran" mənim üçün həmişə doğma klub olaraq qalır. "Xəzər Lənkəran"ın azarkeşləri buna layiq deyil. Onlar komandanın uğurlarına sevinməyə layiqdirlər. Fikrimcə, kluba yeni prezident gələr və komandaya kömək edər.
- Azərbaycandan getdikdən sonra sizə buradan təklif göndərən olmayıb?
- Xeyr. Təklif gəlsə, qəbul edərdim. 34 yaşım var, amma hələ də futbol oynamaq istəyirəm.
- Keçmiş komanda yoldaşlarınızdan kiminləsə əlaqəniz var?
- Bəli. Mario Souza, Junior Martinslə danışıram. Onlarla məhz "Xəzər Lənkəran"da çıxış edərkən tanış olmuşdum.
- "Xəzər Lənkəran" azarkeşlərinə hansısa sözünüz var?
- Azarkeşlərə məni o dövrlərdə həmişə dəstəklədikləri üçün təşəkkürümü bildirirəm. Ümid edirəm ki, bu klub yenidən çempionluq uğrunda mübarizəyə qoşulacaq.
