Roman Qriqorçuk: Kim daha yaxşı hazırlıqlıdırsa, onlar oynayacaq
"Qəbələ"nin baş məşqçisi Roman Qriqorçuk Avropa Liqasının qrup mərhələsi çərçivəsində Rusiya "Krasnodar"ına qarşı oyun öncəsi fikirlərini bölüşüb. Azerisport.az xəbər verir ki, ukraynalı mütəxəssis bu gün baş tutan mətbuat konfransında bunları söyləyib:
- Avroliqa oyunlarında daha çox legionerlərə güvənirdiniz. Ola bilər ki, qrup mərhələsinin son matçında yerli futbolçuları daha çox görək?
- Bizim işə yanaşmamız dəyişməyib. Kimlər daha yaxşı hazırlıqlıdırsa, onlar da meydanda olacaq.
- Qələbə "Qəbələ"yə nə dərəcədə lazımdır?
- Bu matçı qazanmaq üçün böyük istəyimiz var. Yaxşı hazırlaşmışıq. Öz oyunumuzu göstərə bilsək, qələbə qazanmaq şansımız var. Əlbəttə, bunun üçün Rusiyada baş tutan ilk oyunda hakim səhvlərinin olmaması da vacibdir.
- "Qəbələ"nin qrup mərhələsindəki hansı oyunu sizi daha çox məyus edib?
- Bəzi oyunların nəticəsindən narazı qaldıq. Çünki uduzduğumuz görüşlər oldu ki, xal qazanmağa layiq idik. Amma tarixdə tabloda qeydə alınan nəticələr qalır.
- Siz qrup mərhələsinin oyunlarını futbol bayramı hesab edirsiniz. Amma sabah stadiona elə də çox azarkeşin toplanması gözlənilmir. Bu bayramı tək keçirməkdən qorxmursunuz?
- Biz azarkeşlər barədə danışa bilmərik. Onların bizə köməyi az olmayıb. Sabah da biz meydana məhz stadiona gələnlər, bizi televiziyadan izləyənlər üçün oynayacağıq. Azarkeş sayı azdırsa, deməli, o dərəcədə yaxşı oynamırıq.
- "Krasnodar"dan fərqli, sizin hazırlıq üçün az vaxtınız oldu...
- Düşünmürəm ki, bu, həlledici rol oynasın. Qrafik onsuz da sıxdır. Biz şikayətlənməli yox, daha yaxşı hazırlaşmalıyıq.
- "Krasnodar"ı çalışdırmaq istəyərdiniz?
- Mən "Qəbələ"ni çalışdırmaq istəyirəm.
