Ya formanın haqqını verin, ya da...

I divizonda oynamaq ayıb deyil. Hafiz Məmmədov düz deyir, hər bir klubun başına gələcək hadisədir bu. Vaxt olub ki, aparıcı top-klublar da aşağı divizionda oynayıblar. Səbəblər fərqli olsa belə, “Yuventus”u, “Monako”nu bu baxımdan nümunə göstərmək olar.

“Bakı”nın I divizionda çıxış etməsi faciə deyil. Amma dünən “Bakılı”dan alınan məğlubiyyət faciədir. Söhbət heç məğlubiyyətdən də getmir. Söhbət, komandanı çətin vəziyyətdə qoyub, qaçanlardan gedir. Harada görülüb ki, kapitan gəmini hamıdan əvvəl tərk etsin? Harada görülüb ki, klubun öz yetirməsi olan, bu günə kimi akademiyada qalan futbolçu “ehtiyatda qalıramsa, çıxıb gedirəm” desin? Harda görülüb ki, klubun xarici ölkələrə göndərib, əməliyyat elətdirdiyi futbolçusu oyuna gəlməsin?

Bəli, “Bakı”nın futbolçuları 2 aydır maaş almırlar. Lakin bu gün maliyyə problemi təkcə “Bakı”da deyil axı. Bu gün Premyer Liqanın əksər klublarında pul sıxıntısı yaşanır. Baş verən siyasi hadisələr də göstərdi ki, Hafiz Məmmədov biznesində səhvə yol verməyib. Sadəcə, kənar təsirlər iş adamını çətin vəziyyətə salıb. Bütün çətinliklər də artıq yoluna qoyulmaq üzrədir. Qısa müddətdən sonra hər şey yaxşı olacaq.

“Bakı”nın akademiyası xeyli futbolçu yetişdirib. Amma belə görünür ki, şəxsiyyət yetişdirə bilməyib. Futbolçu ilk növbədə şəxsiyyət olmalıdır. “Pul əl çirkidir” deyimi boş söhbətdir. Pul hamıya lazımdır. Lakin həyatda puldan da vacib məqamlar var. 16-17 yaşında futbolçuya nə lazımdır? Məşq meydançası, forma, oyuna çıxmaq. Bunun üçün də “Bakı”nın bazasında hər bir şərait var. Vaxtı-vaxtında qidalanırlar da.

Hafiz Məmmədov Azərbaycan futboluna adına çox iş görüb. Onun futbolumuza verdiyi ən böyük töhfələrdən biri “Bakı”nın akademiyasıdır. Bu gün həmin uşaqlar “Bakı”nın heyətində yetişməsəydilər, akademiyada futbolun sirlərinə yiyələnməsəydilər, harada olacaqdılar? Bir anlıq bu sualı özünüzə verin, bəylər...

Elə futbolçu var ki, yayda “Bakı” transfer vərəqini özünə verib. Lakin 1-2 ay səy göstərsə də, heç bir klubla anlaşa bilməyib, komandaya qayıdıb. Futbolçu var ki, ağır zədə alıb. Ömrü boyu şikəst qalacağından qorxaraq, ağlayıb. Həmin hadisə gözümün qarşısında olub, bugünki kimi yadımdadır həmin göz yaşları. Amma Hafiz Məmmədov o cür gənclərdən üz döndərməyib. Hər birinə sahib çıxıb. Ölkə xaricinə əməliyyata göndərib. Aylarla bazada qalıb, qidalanıb, müalicə olunub, maaş alıb. Oynamaya-oynamaya. Bütün bunların qarşılığında budur Hafiz Məmmədova, “Bakı”ya olan hörmətiniz? Keçmişi unutmaq olmaz, bəylər...

Dünən “Bakılı” ilə oyunu izləyən hər 10 nəfərdən 9-u “Bakı” qəsdən oynamır” deyirdi. Sabah lazım gəlsə, “Bakı” I divizionda U-19, U-17, lap U-15 komandası ilə də oynayar. Onsuz da bu, müvəqqəti çətinlikdir. Növbəti mövsümdə “Bakı” yenə də Premyer Liqada olacaq. İtirən siz olacaqsınız, “Bakı” yox. “Bakı”dan kimlər getməyib ki? Amma komanda dağılmayıb, dağılmayacaq da. O formanı geyib, meydana çıxırsınızsa, kişi kimi oynayın. Ya o formanın haqqını verin, ya da ...

Komandanı heç olmasa, qarda-boranda yanınızda olan, “Rəvan”la oyunda o cür soyuqda dayanmadan sizə dəstək verən azarkeşlər qədər sevin...

P.S. 1 ay əvvəl televiziyaya çıxıb “sağ olsun “Bakı”, sağ olsun Hafiz Məmmədov, məqsədimiz növbəti mövsüm Premyer Liqaya qayıtmaqdı” deyənlər, bu gün meydana çıxmaq istəmirlər. Heç olmasa, sözünüzə hörmət qoyun, bəylər.

İbrahim, futbolxeber