Məhəmməd Mirzəbəyov: Ümid edirəm ki, bu çətin dövrü geridə qoyacağıq
"Qəbələ"nin müdafiəçisi Məhəmməd Mirzəbəyov Azərbaycan Kubokunun 1/8 final mərhələsi çərçivəsində "Mil-Muğan"a qarşı keçirəcəkləri oyun öncəsi azerisport.az saytının suallarını cavablandırıb.
- Komandada özünəinam var?
- Biz hər bir oyuna ciddi hazırlaşırıq. Yəni rəqibin kimliyinin bizim üçün fərqi yoxdur. Əsas öz oyunumuzdur. Hər bir komandaya ciddi yanaşmaq lazımdır.
- "Mil-Muğan" birinci divizionda çıxış edir. Sizcə, "Qəbələ" uğursuz gedişata bu rəqiblə oyunda son qoya biləcək?
- Biz bu komanda ilə oyuna ciddi yanaşırıq. Motivasiya yüksəkdir. Uğur qazanmaq istəyirik.
- Premyer Liqanın son turunda "Rəvan"dan bir xalı doğma meydanda çətinliklə ala bildiniz. Həmin oyunla bağlı nə deyə bilərsiniz?
- Maraqlı oyun oldu. Biz həmin görüşdə çoxlu qol vəziyyəti yaratdıq. Təəssüf ki, onlardan yararlana bilmədik. Bir yox, daha çox qol vura bilsəydik, qələbə qazanardıq.
- Yeganə qolunuzun müəllifi Fakundo Pereyraya məhsuldar ötürməni siz etdiniz. Bu, sizin qarşıdakı oyunlarda da start heyətdə yer almağınıza kömək edəcək?
- Bunu mən deyə bilmərəm. Start heyətdə daha yaxşı hazırlıqlı olan futbolçular çıxırlar. Buna isə baş məşqçi qərar verir.
- Epizodların birində siz baş hakimdən penalti tələb edirdiniz...
- Çox təəssüf ki, hakim həmin epizodda mənə sarı vərəqə göstərdi. İnanın ki, mən hələ də simulyasiya nə olduğunu bilmirəm. Heç vaxt elə hərəkət etməmişəm. Amma hakimi də başa düşmək olar. Çətin epizod idi. Hakimi heç nədə günahlandırmıram. Lakin həmin epizodda penalti var idi.
- Avroliqadakı çıxışınızı necə qiymətləndirərdin?
- Avroliqa kimi böyük turnirlə vidalaşmaq çox üzücüdür. Bu mövsüm çox böyük təcrübə topladıq. Yəqin ki, hər bir futbolçu belə bir turnirdə oynamağı arzulayırdı.
- Son turda Rusiya "Krasnodar"ını qəbul edəcəksiniz. Bu görüşdə ilk qələbənizi qazana biləcəksiniz?
- Hədəfimiz qələbə qazanmaqdır. Bunun üçün əlimizdən gələni edəcəyik.
- "Qəbələ" niyə qələbə qazana bilmir?
- Elə də böyük problemimiz yoxdur. Sadəcə, qara zolağa düşmüşük. Amma biz hər oyuna qələbə üçün çıxırıq. Ümid edirəm ki, bu çətin dövrü geridə qoymağa nail olacağıq.
