Elnur Abdullayev: İnterin də kuboku qazanmaq şansı var
"İnter"in yarımmüdafiəçisi Elnur Abdullayev Azərbaycan Kubokunun 1/8 final mərhələsi çərçivəsində "Turan Tovuz" üzərində qazandıqları 3:1 hesablı qələbəni şərh edib. Azerisport.az saytına açıqlamasında o, bunları söyləyib:
"Çətin oyun oldu. Buna baxmayaraq, biz matçın taleyini ilk yarıda həll etməyi bacardıq. Amma Tovuz təmsilçisi bizə qarşı xarakter nümayiş etdirdi, sonadək mübarizə apardı. Sadəcə, rəqib komanda üçün elita təmsilçisinə qarşı mübarizə aparmaq çətin idi. Çünki heyəti daha çox gənclərdən qurulub, təcrübəsizdirlər. İstənilən halda biz arzuladığımız nəticəni qazana bildik. "Turan Tovuz"a da birinci divizionda uğurlar arzulayıram".
Abdullayev "İnter"in kuboku qazanmaq şansından da danışıb: "Bizi qarşıda daha çətin oyunlar gözləyir. Digər klublar kimi biz də kuboku qazanmaq istəyirik. Fikrimcə, bunun üçün yaxşı şansımız var. Zəif komanda deyilik və hədəfimizə çatacaq gücümüz var".
Yarımmüdafiəçi klubun maddi problemlərinə də toxunub: "Maliyyə problemi bütün klublarda var. Amma bizim aylıq məvaciblərimiz verilir. Başqa heç nə deyə bilmərəm".
