Cavid İmamverdiyev: 8:0 bizi çox sevindirmir
"Neftçi"nin yarımmüdafiəçisi Cavid İmamverdiyev Azərbaycan Kubokunun 1/8 final mərhələsi çərçivəsində "Qaradağ Lökbatan"a qarşı keçirdikləri oyundan (8:0) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Belə böyük hesablı qələbə qazandığımıza görə fəxr etməməliyik. Çünki bu gün birinci divizion klubuna qarşı oynayırdıq. Ona görə də qələbə bizi elə də xüsusi sevindirmir. Amma qələbə qələbədir. Bu, bizim özünəinamımızı daha da artıracaq. "Qaradağ Lökbatan"a da qarşıdakı oyunlarda uğurlar arzulayıram.
- Hər şeyin bu qədər yüngül olacağını gözləyirdiniz?
- Biz sadəcə, bu oyuna ciddi yanaşdıq və qarşımızdakı komanda barədə düşünməməyə çalışdıq. Ona görə də belə bir qələbə qeydə alındı.
- Qarşıda sizi Premyer Liqa çərçivəsində "Zirə"yə qarşı oyun gözləyir. Uğurlu seriyanı davam etdirə biləcəksiniz?
- Bunu hamımız çox istəyirik. Artıq uduzmaq olmaz. Ancaq qələbə qazanmaq lazımdır.
- Növbəti rəqibinizi mövsümün sürpriz komandası adlandırmaq olar. Sizcə, "Zirə"nin əsas gücü nədədir?
- Bu komandanın oyunu xoşuma gəlir. Amma biz də "Neftçi"nin şərəfini qoruyuruq. Bu, xalqın komandasıdır, üç günlük klub deyil. Düzdür, onlarla ilk oyunda uduzmuşduq. Amma cavab görüşündə mütləq qələbə qazanmalıyıq.
- Öz çıxışınız barədə nə deyə bilərsiniz? Bəzi epizodlarda səhvlərə yol verdiniz...
- Hərdən belə olur. Əsas odur ki, zədə olmasın. Formamı isə gec-tez bərpa edəcəyəm. Forma yığdıqdan sonra bu cür səhvlər olmayacaq və komandama daha çox fayda verəcəyəm.
