Çingiz Abdullayev: Əsgər Abdullayevin uğurlarına sevinsək də, fikrimizi dəyişməmişik

"Neftçi"nin Müşahidə Şurasının sədri Çingiz Abdullayev Topaz Premyer Liqasının 14-cü turu çərçivəsində "Qarabağ"a qarşı keçirilmiş oyundan sonra fikirlərini bölüşüb. Azerisport.az xəbər verir ki, o, 1:0 hesabıyla qalib gəldikləri görüşü belə şərh edib:

"Komandamız yaxşı oynadı. Sevindiri haldır ki, belə bir oyunda qol buraxmadıq. Kimlərsə bu futbolçuların futbol oynamağı bacarmadığını deyirdi. Amma indi onların necə oynadığını hər kəs gördü. Həmçinin son iki oyunda heç bir xal qazanacağımızı da təxmin edənlər var idi. Lakin biz çox uğurlu nəticələrə imza atdıq".

Klub rəhbəri baş məşqçi postuna gətirdikləri Əsgər Abdullayevin bu nəticələrindən sonra onun qışda əcnəbi mütəxəssislə əvəzlənməsinin mümkünlüyü barədə də danışıb: "Heç nə dəyişməyib. Planlarımız olduğu kimi qalır. Əlbəttə, Abdullayevin rəhbərliyi altında uğurlu nəticələrə imza atmağımız bizi sevindirir. O, komandada qalacaq. Ola bilər ki, baş məşqçi kimi qalsın. Amma mən fikrimi dəyişməyi xoşlamıram. İstənilən halda, Əsgər Abdullayev ilin sonunadək baş məşqçidir. Əsgəri dəstəkləmək istəyirik. Lakin hazırda əsas hədəfimiz əcnəbi mütəxəssisdir. "Neftçi" heç də yaxşı vəziyyətdə deyil. Oyun planında daha da artırmaq istəyirik. Azərbaycanda bizim klub çox sevilir. Digər klublara hörmətlə yanaşıram. Amma qalan 9 klubun hamısını götürsək, "Neftçi"nin tərəfdarları onlardan artıq olar. Uğurlar qazanmağa davam etmək istəyirik".

Abdullayev "Qarabağ" üzərindəki qələbənin önəmindən də danışıb: "İki ildən çox idi ki, "Qarabağ"a qalib gələ bilmirdik. Bu rəqiblə ötən oyunda da pis oynamamışdıq. Lakin matçın sonlarındakı şübhəli penalti bizi qələbədən etdi. Əks halda həmin görüşdə də qalib gələcəkdik. Komandamızın üzvləri gənclərdir. Matçın sonlarında verilən o cür qərarlar bunları "sındıra" bilər. Biz onların özlərinə inanmalarını istəyirik. Gənclərimizin gələcəyinə inanırıq".