Vaqif Cavadov: Heyəti mən formalaşdırmıram

"Qəbələ"nin yarımmüdafiəçisi Vaqif Cavadov Avropa Liqasının qrup mərhələsinin beşinci turu çərçivəsində Yunanıstanın PAOK klubuna qarşı keçirdikləri səfər oyunundan (0:0) sonra azerisport.az saytının suallarını cavablandırıb.

- Matçla bağlı nə deyə bilərsiniz?
- Çox yaxşı oyun alındı. Demək olar ki, bütün oyun ərzində üstünlük bizim tərəfimizdə idi. Hər iki hissədə yaxşı futbol sərgilədik. Qol epizodlarımız kifayət qədər idi. Sadəcə, onların heç birindən yararlana bilmədik. Qələbə qazana bilərdik. Komandamızı belə oyuna görə təbrik etmək olar.

- İkinci hissədə meydana çıxdınız. Roman Qriqorçuk sizə hansı tapşırıqları verdi?
- Komandaya həm hücumda, həm də müdafiədə dəstək göstərməyi.

- Sizcə, baş məşqçinin tapşırıqlarını yerinə yetirə bildiniz?
- Bunu ən yaxşısı baş məşqçidən soruşun.

- Meydanda kifayət qədər fəal idiniz. Start heyətdə meydana çıxsaydınız, komandaya daha çox fayda verə bilərdiniz?
- "Qəbələ"yə gəldiyim ilk gündən özümü oynamağa hazır hiss edirəm. Amma heyəti formalaşdırmaq baş məşqçinin işidir. Bu barədə danışmaq mənə düşmür. Mən sadəcə, hər bir oyunda komandaya faydalı olmağa çalışıram.

- Son saniyələrdəki bir epizodda yanınızda komanda yoldaşınız olsa da, ona ötürmə etmək əvəzinə qapıya zərbə vurdunuz. Oyunda son nöqtəni özünüz qoymaq istəyirdiniz?
- Komanda yoldaşımı görürdüm. Hətta imkanım olsaydı, ötürmə də edəcəkdim. Amma son saniyələr gedirdi, rəqib də müdafiəyə qapanmışdı. Ona görə də düşündüm ki, topu itirməkdənsə qapıya zərbə vurmaq daha yaxşı olar.

- Oyuna çıxanda artıq qrupun digər matçında Rusiya "Krasnodar"ının Dortmund "Borussiya"sına (Almaniya) qalib gəldiyini bilirdiniz. Bu, sizin oyununuza təsir göstərdi?
- Təsir göstərməyə bilməzdi. Biz artıq "Krasnodar"ın qalib gəlib, qrupdan çıxdığını bilirdik. Amma buna baxmayaraq, yenə də PAOK-a qalib gəlmək istəyirdik. Mənə elə gəlir ki, qazandığımız bir xalı da pis nəticə saymaq olmaz. "Krasnodar"a qarşı keçirəcəyimiz son oyunda qələbə qazanmağa çalışacağıq.