Dmitri Bezotosnı: Qol vura bilməməyimiz təkcə hücum xəttinin problemi deyil
"Qəbələ"nin qapıçısı Dmitri Bezotosnı Avropa Liqasının qrup mərhələsinin beşinci turu çərçivəsində Yunanıstanın PAOK klubuna qarşı keçirdikləri səfər oyunundan (0:0) sonra azerisport.az saytının suallarını cavablandırıb.
- PAOK-a qalib gəlməyinizə nə mane oldu?
- Qol vəziyyətlərindən yararlana bilməməyimiz. Hücumları məntiqi sonluqla başa çatdırmaq baxımından problemlərimiz var idi.
- Zədənizi yenicə sağaltsanız da, heç də pis təsir bağışlamadınız...
- Bərpa dövrünü yaxşı keçirmişdim. Məşq etmişdim.
- Komandanızın pley-offa çıxa bilməməsinə nə səbəb oldu?
- Qələbə qazanmaq üçün qol vurmaq lazımdır. Biz hər oyunda fərqlənmək üçün yaxşı qol şanslarına malik olduq. "Krasnodar"la Rusiyadakı, "Borussiya" ilə Bakıdakı oyunlarda da belə oldu. "Borussiya"ya hətta birinci dəqiqədə qol vura bilərdik. Həmin qol epizodlarının hər oyunda azı ikisindən yararlana bilsəydik, indi vəziyyət tam fərqli ola bilərdi. PAOK-la oyunlarda da bu baxımdan çox əziyyət çəkdik.
- Deməli, "Qəbələ"nin hücum xəttində problem var?
- Xeyr, mən belə deməzdim. Çünki biz bütöv komanda halında həm hücum edir, həm də müdafiə olunuruq. Ona görə də problemin yalnız hücumçulardan qaynaqlandığnı deməzdim. Qələbə üçün bütün komanda çalışır, təkcə hücumçular yox.
- Qrupun digər oyununda "Krasnodar"ın "Borussiya"ya qalib gələcəyini gözləyirdiniz?
- Düzünü deyim ki, belə olacağını düşünməmişdim. Amma bildiyimə görə, "Borussiya" Rusiyaya he də güclü heyətlə yollanmamışdı. İstənilən halda bu, futboldur. "Borussiya" öz hədəfləri üçün çalışır, biz də öz hədəflərimiz üçün. Sadəcə, bizim bəzi oyunlarda bəxtimiz gətirmədi.
- Qrupdakı son oyunda Bakıda "Krasnodar"la qarşılaşacaqsınız...
- Düzünü deyim ki, "Krasnodar"ın hədəfinə çatdığı üçün Bakıya hansı heyətlə gəlməsinin mənim üçün ciddi fərqi yoxdur. Həm də indidən həmin oyunu düşünmək istəmirəm. Bunun üçün yetərincə vaxt var. Biz hələlik, çempionat oyunlarını düşünməliyik.
- Amma ruslarla görüşdə qrup mərhələsindəki ilk qələbənizi qazana bilərsiniz...
- Baxacağıq. Biz də buna ümid edirik. Amma dediyim kimi, "Krasnodar"la oyuna çox vaxt qalır. Biz hələlik, "Rəvan"la qarşıdakı görüşü düşünməliyik. Bu oyuna köklənib, istəyimizə çatmalıyıq. Əlbəttə, "Krasnodar"la oyuna da ciddi hazırlaşacağıq. Həmin oyunun əhəmiyyətsiz olduğunu demək olmaz. Son tur olmasına baxmayaraq, biz Avropa Liqasında özümüzü yaxşı tərəfdən göstərməyə çalışmalıyıq.
- Qış transfer pəncərəsinin açılmasına çox az vaxt qalıb. Siz hansısa klubdan təklif almısınız?
- Xeyr. İndi bu, mənə heç lazım da deyil. Məni "Qəbələ"də hər şey qane edir - kollektiv, atmosfer. Şadam ki, bu komandadayam və ona kömək edirəm.
- Premyer Liqada işləriniz yaxşı getmir. Bunun Avroliqadakı çıxışınızla əlaqəsi var?
- Bu barədə dəqiq bir söz deyə bilmərəm. Uşaqların hamısı qələbə qazanmaq üçün əlindən gələni edir. Hər bir komandada eniş və yüksəliş dövrü olur. Ümid edirəm ki, "Rəvan"la oyundan etibarən hər şey qaydasına düşəcək.
