Ansi Aqolli: Tottenhem istənilən heyətlə güclü və təhlükəlidir
"Qarabağ"ın müdafiəçisi Ansi Aqolli Avropa Liqasının qrup mərhələsinin beşinci turu çərçivəsində İngiltərənin "Tottenhem" klubuna qarşı keçirəcəkləri oyun öncəsi azerisport.az saytının suallarını cavablandırıb.
- "Qarabağ" bu oyuna necə hazırlaşıb?
- Ən yaxşı formada hazırlaşmağa çalışmışıq. Komandamızda döyüşkən ruh ən yüksək səviyyədədir. Hamı ən yaxşı oyun sərgiləmək istəyilə alışıb yanır.
- Bəzi futbolçularınızın zədəli olması sizə mane ola bilər?
- Düzdür, zədə səbəbindən bəzi oyunçularımız bizə kömək edə bilməyəcək. Amma biz bir komandayıq və inanıram ki, onların yoxluğunda da istəyimizə çata biləcəyik.
- Bu, "Tottenhem"lə oyunda qələbə qazanmaq şansınızı azaltmır?
- Bu oyunda hər şey baş verə bilər. Ola bilsin ki, açıq oyun getsin. Öz gücümüzə inanırıq. Hesab edirəm ki, adlı-sanlı rəqibimizə müqavimət göstərə bilərik.
- İngiltərə klubu Bakıya bir neçə aparıcı futbolçusunu gətirməyib. Bu, sizin üçün nəyisə dəyişir?
- "Tottenhem" dünyanın ən yaxşı çempionatı hesab olunan İngiltərə Premyer Liqasında çıxış edir. Heyətində 25 yüksək səviyyəli futbolçu var. Sizcə, yeddi futbolçunun yoxluğu onlar üçün itkidir? Bu komanda həmin oyunçularsız da güclü və təhlükəlidir.
- Mümkün qələbə "Qarabağ"a tarixi bir şans - pley-offa çıxmaq fürsəti qazandıra bilər...
- Biz də bunu başa düşürük və bunun üçün çalışırıq. Qrupda yer alan komandaların xal fərqi çox azdır. Son iki oyunu uğurlu keçirə bilsək, lazım olan nəticəni qazana bilərik.
- "Qəbələ"nin növbəti xal itkisi sizin zirvədəki mövqeyinizi daha da möhkəmləndirməyinizə şərait yaratdı. Bu gedişlə cari mövsüm sizin üçün daha asan olacaq. Razısınız?
- Xeyr. Çempionatın heç bir oyununda asan qələbə qazanmaq olmur. Bəli, hazırda izləyicilərimizlə yaxşı xal fərqi yaratmışıq. Amma bu, çempionluğumuza zəmanət vermir. Mövsümün sonuna hələ çox vaxt var. Bizə sadəcə, indiki üstünlüyümüzü qorumaq, bu tempdə davam etmək lazımdır.
