Roman Qriqorçuk: Uğurlu seriyanın davam etməsini çox istəyərdim
"Qəbələ"nin baş məşqçisi Roman Qriqorçuk Avropa Liqasının qrup mərhələsi çərçivəsində Yunanıstanın PAOK klubuna qarşı keçirəcəkləri səfər oyunu öncəsi fikirlərini bölüşüb. Azerisport.az xəbər verir ki, ukraynalı mütəxəssis Salonikada baş tutan mətbuat konfransında bunları söyləyib:
- Hava bir qədər yağışlıdır. "Krasnodar"la səfər oyununda da belə idi. Bu, sizi narahat etmir?
- Yağış məni hər şeydən az narahat edən məqamdır. Proqnozlara görə, sabah yağış olmayacaq. Bu, problem deyil.
- Bu mövsüm Kipr "Apollon"u, Yunanıstan klubları sizinlə bacarmır. Bu dəfə necə olacaq?
- Qələbə qazanmağımız ideal olardı. Bu, çox çətin olacaq. Müxtəlif seriya və statistikalar barədə danışmağı xoşlamıram. Amma çox istəyərdim ki, bu uğurlu seriyamız davam etsin.
- Zədəli futbolçularınızla bağlı vəziyyət nə yerdədir? Dodo, Dmitri Bezotosnı, Ermin Zets necədir?
- Dododan başqa hamı məşq edir. Amma iki-üç həftə oynamayan futbolçu optimal formada ola bilməz. İstənilən halda risk edib, onlardan hansılarısa heyətdə oynatmalı olacağıq.
- Qrupda elə vəziyyət yaranıb ki, "Qəbələ" qalan hər iki oyundan qələbə ilə ayrılmalıdır...
- Sabah "Krasnodar"la "Borussiya" arasındakı oyun bizim görüşdən iki saat öncə başlayacaq. Yəni meydana həmin oyunun nəticəsini bilərək çıxacağıq. Bizim üçün həmin oyunda "Borussiya"nın qələbə qazanması vacibdir. Çox istəyərdim ki, hər şey bizim üçün uğurlu nəticələnsin. Özümə də, komandama da ən yaxşısını arzulayıram.
- Avroliqanın qrupunda oynamaq sizə nə verdi və ya nə aldı?
- Böyük təcrübə qazandıq. Özümüzə inandıq. Daha da inkişaf etmiş olduq. Çox istəyərdimki, Azərbaycan yazda da Avroliqada iki klubla təmsil olunsun. "Qarabağ"a da uğurlar arzulayıram. Sabah elə bir şans qazanmaq istəyirəm ki, hər şeyi son turda həll edə bilək. Bir dəfə bu hissləri yaşamışam. Yenidən eyni şansı qazanmağı çox arzulayıram.
- "Borussiya"ya qarşı üç müdafiəçi ilə oynamışdınız. Bu dəfə də sizdən eyni taktikanı gözləmək olar?
- Dortmunddakı oyunda cinah müdafiəçilərimizin fəal olması bizim üçün vacib idi. Sabah necə oynayacağımız həm də əlimizdəki materialdan asılıdır. Məsələn, bu dəfə Dodo oynamayacaq.
- Fakundo Pereyra PAOK-a məxsus olduğundan, onu meydana buraxa bilməyəcəksiniz. Bu, əlavə itkidir?
- Əlbəttə, hər bir futbolçunun olmaması bir itkidir. Amma bu, razılaşmadır. Əvvəlcədən razılaşdırılan hər bir şeyə əməl etmək lazımdır.
- Qələbəyə inandığınızı dediniz. Bu əminlik haradandır? PAOK-un indiki vəziyyətindən?
- Xeyr, bunun PAOK-un hansı vəziyyətdə olması ilə bağlı deyil. Rəqib barədə bildiklərimizi futbolçulara söyləmişik. Amma əsas bizim lazım olan uğura öz inanımımızdır.
